Bugun, 22 avgust kuni Rossiya Prezidenti Vladimir Putin Ozarbayjon rahbari Ilhom Aliyevning rafiqasi va mamlakatning birinchi vitse-prezidenti Mehribon Aliyevaning tavallud ayyomi bilan muborakbod etdi. Tabriknoma matni Ozarbayjon Prezidentining matbuot xizmati tomonidan e’lon qilindi.
“Hurmatli Mehribon Arifovna, tug‘ilgan kuningiz bilan chin yurakdan tabriklayman. Sizga mustahkam sog‘lik, baxt, farovonlik va faoliyatingizda muvaffaqiyatlar tilayman”, — deyiladi Putin maktubida.
Rossiya yetakchisi maktub oxirida Mehribon Aliyeva turmush o‘rtog‘i Ilhom Aliyevga va butun Aliyevlar oilasiga salom yetkazishni ham so‘ragan.
Tabriknoma ikki davlat o‘rtasidagi sovuq munosabatlar fonida yuborilgani e’tiborni tortdi. Aqtau shahrida Ozarbayjon samolyoti qulashi va ikki davlatda fuqarolar qo‘lga olinishi Moskva va Boku aloqalarini keskinlashtirgan edi.
Ma’lumot uchun, Mehribon Aliyeva 1964 yil 26 avgust kuni Boku shahrida tug‘ilgan. 2017 yildan beri Ozarbayjonning birinchi vitse-prezidenti lavozimida faoliyat yuritib kelmoqda. U siyosatga kirishishidan avval Haydar Aliyev jamg‘armasiga rahbarlik qilgan va parlament deputati bo‘lgan.
Eslatib o‘tamiz, yaqinda Ilhom Aliyev va Vladimir Zelenskiy o‘rtasida telefon aloqasi bo‘lib o‘tgan. Ular Rossiya tomonidan Ozarbayjonning SOCAR kompaniyasining Ukraynadagi neft bazasiga berilgan havo hujumini qoralagan edi.
