Afgʻonistondagi “Tolibon” muvaqqat hukumatining tashqi ishlar vaziri Amirxon Muttaqiy avvalgi hukumat agʻdarilganidan keyin Afgʻonistondan Oʻzbekiston va Tojikistonga olib oʻtilgan vertolyotlarni qaytarishga chaqirdi. Bu haqda u “Tolibon” tashqi ishlar vazirligi tomonidan diplomatlar va xalqaro tashkilotlar ishtirokida oʻtkazilgan yigʻilishda soʻz ochdi.
Muttaqiy, shuningdek, mamlakaga nisbatan sanksiyalarini bekor qilish va Afgʻoniston sharqidagi zilzila jabrdiydalariga yordam koʻrsatish zarurligini qayd etgan.
“Biz toʻrt yil oldin siyosiy oʻzgarishlardan keyin bizning ayrim vertolyotlarimizni olib, qoʻshni davlatlarga topshirgan mamakatlardan ularni afgʻon xalqiga qaytarishni soʻraymiz, ular insonparvarlik operatsiyalarida ishlatiladi”, deydi u.
Nutqining boshqa qismida Muttaqiy Afgʻonistonga nisbatan joriy etilgan sanksiyalar masalasiga toʻxtalgan. Uning soʻzlariga koʻra, ushbu sanksiyalar oqibatida joriy etilgan bank cheklovlari chet eldagi ayrim afgʻonistonliklarga mamakatga moddiy yordam yuborishni qiyinlashtirgan. Shu tariqa Muttaqiy xalqaro hamjamiyatni yana bir bor mamakatga qarshi sanksiyalarni bekor qilishga chaqirgan.
“Afsuski, Afgʻonistonga qarshi joriy etilgan adolatsiz va noqonuniy cheklovlar tufayli yurtdoshlarimiz zilziladan jabrlanganlarga yordam yubora olmayapti”, — deydi u.
