Har bir hisob raqamiga davlat tomonidan 500 AQSh dollari miqdorida mablag‘ joylashtirildi.
Prezident topshirig‘i asosida Yangi yil munosabati bilan o‘tkazilgan “Prezident archasi” tadbiri doirasida 0–17 yoshdagi 8 ming nafardan ortiq yetim hamda ota-ona qaramo‘g‘idan mahrum bo‘lgan bolalar uchun omonat depozit hisob raqamlari ochildi. Har bir hisob raqamiga davlat tomonidan 500 AQSh dollari miqdorida mablag‘ joylashtirilib, u yildan-yilga kapitalizatsiya hisobiga oshib boradi.
Mazkur mablag‘lardan bolalar 18 yoshga to‘lgach foydalanish huquqiga ega bo‘lib, mustaqil hayotga qadam qo‘yish uchun muhim moliyaviy tayanchga ega bo‘ladi.
Shuningdek, 9 yoshdan katta bolalar va ularning qonuniy vakillariga ijtimoiy kartalar berildi. Ushbu kartalar orqali jamoat transportidan imtiyozli foydalanish, to‘lovlarni amalga oshirish, shaxsni tasdiqlash hamda ijtimoiy yordam va xizmatlardan foydalanish mumkin. Barcha operatsiyalarni “Baraka” mobil ilovasi orqali nazorat qilish imkoni mavjud.
Qo‘llab-quvvatlash mahallalarda yashovchi yetim bolalar, mehribonlik uylari va SOS bolalar qishloqlari tarbiyalanuvchilari, shuningdek, ota-onalari Vatan himoyasida halok bo‘lgan hamda “Taskin” bolalar xospisida davolanayotgan bolalarni qamrab oladi. “Taskin” xospisidagi bolalar uchun depozit mablag‘laridan zaruratga ko‘ra istalgan vaqtda foydalanish imkoniyati ham belgilangan.
