Mojaroning yettinchi kuni ertalabiga kelib, Eron, AQSh va Isroil o‘rtasidagi keskinlik hanuz juda yuqori darajada qolmoqda. Tunda va tongda raketa zarbalari hamda harbiy amaliyotlar davom etdi.
AQSh Eronning harbiy ob’ektlariga keng ko‘lamli zarbalarni davom ettirmoqda. AQSh Markaziy qo‘mondoni general Brad Cooper so‘nggi 72 soat ichida Amerika bombardimonchi samolyotlari o‘nlab nishonlarga zarba berganini ma’lum qildi. Uning so‘zlariga ko‘ra, strategik B-2 samolyotlari yer ostida chuqur joylashgan ballistik raketa ob’ektlariga ham hujum qilgan.
Isroil armiyasi matbuot xizmati Bayrutga yangi zarbalar to‘lqini boshlanganini ma’lum qildi. Isroil harbiylari shaharning Dahiya tumanida joylashgan "Hizbulloh" infratuzilmasiga hujum qilgan.
Eron droni Ozarbayjonning Naxichevan shahridagi xalqaro aeroportga zarba berdi. Ozarbayjon prezidenti Ilhom Aliyev bu hodisani terrorchilik akti deb atadi. Shundan so‘ng Boku Eron bilan chegaradan yuk mashinalari harakatini vaqtincha to‘xtatdi hamda Eron fuqarolarining mamlakatga kirishini taqiqladi.
Ayrim manbalarga ko‘ra, so‘nggi besh kun ichida Eron 12 davlatga hujum qilgan: Ozarbayjon, Isroil, AQSh, Bahrayn, Iroq, Iordaniya, Quvayt, Ummon, Qatar, Sauudiya Arabistoni, BAA va Kipr.
Eron tashqi ishlar vaziri Abbos Aroqchi Tehron o‘t ochishni to‘xtatishni so‘ramaganini va AQSh bilan muzokara olib borishni rejalashtirmayotganini aytdi. U shuningdek, AQSh tomonidan ehtimoliy quruqlikdagi bosqin "falokatli oqibatlarga" olib kelishini ogohlantirdi. Aroqchining ta’kidlashicha, Rossiya va Xitoy Eronni siyosiy va boshqa shakllarda qo‘llab-quvvatlamoqda.
Eron hozircha Hormuz bo‘g‘ozini yopishni rejalashtirmayapti, dedi mamlakat TIV rahbari.
