Можаронинг еттинчи куни эрталабига келиб, Эрон, АҚШ ва Исроил ўртасидаги кескинлик ҳануз жуда юқори даражада қолмоқда. Тунда ва тонгда ракета зарбалари ҳамда ҳарбий амалиётлар давом этди.
АҚШ Эроннинг ҳарбий объектларига кенг кўламли зарбаларни давом эттирмоқда. АҚШ Марказий қўмондони генерал Бред Купер сўнгги 72 соат ичида Америка бомбардимончи самолётлари ўнлаб нишонларга зарба берганини маълум қилди. Унинг сўзларига кўра, стратегик B-2 самолётлари ер остида чуқур жойлашган баллистик ракета объектларига ҳам ҳужум қилган.
Исроил армияси матбуот хизмати Байрутга янги зарбалар тўлқини бошланганини маълум қилди. Исроил ҳарбийлари шаҳарнинг Даҳия туманида жойлашган “Ҳизбуллоҳ” инфратузилмасига ҳужум қилган.
Эрон дрони Озарбайжоннинг Нахичеван шаҳридаги халқаро аэропортга зарба берди. Озарбайжон президенти Илҳом Алиев бу ҳодисани террорчилик акти деб атади. Шундан сўнг Боку Эрон билан чегарадан юк машиналари ҳаракатини вақтинча тўхтатди ҳамда Эрон фуқароларининг мамлакатга киришини тақиқлади.
Айрим манбаларга кўра, сўнгги беш кун ичида Эрон 12 давлатга ҳужум қилган: Озарбайжон, Исроил, АҚШ, Баҳрайн, Ироқ, Иордания, Қувайт, Уммон, Қатар, Саудия Арабистони, БАА ва Кипр.
Эрон ташқи ишлар вазири Аббос Ароқчи Теҳрон ўт очишни тўхтатишни сўрамаганини ва АҚШ билан музокара олиб боришни режалаштирмаётганини айтди. У шунингдек, АҚШ томонидан эҳтимолий қуруқликдаги босқин “фалокатли оқибатларга” олиб келишини огоҳлантирди. Ароқчининг таъкидлашича, Россия ва Хитой Эронни сиёсий ва бошқа шаклларда қўллаб-қувватламоқда.
Эрон ҳозирча Ҳормуз бўғозини ёпишни режалаштирмаяпти, деди мамлакат ТИВ раҳбари.
