Markaziy bankning 2019 yil yakunlari bo`yicha pul-kredit siyosati ko`rsatkichlari to`g`risida dastlabki ma`lumotlarida aholi omonatlarining umumiy depozitlardagi ulushi to`g`risida ma`lumot taqdim etildi.
Qayd etilishcha, 2019 yil davomida pul massasi tarkibida ijobiy o`zgarishlar kuzatilgan. Xususan: milliy valyutadagi jami muddatli depozitlar hajmi 43 foizga, jumladan, aholi omonatlari hajmi 54 foizga oshgan. Muomaladagi naqd pullar miqdorining o`sish sur`ati umumiy pul massasi o`sishiga nisbatan past bo`lib, 9,4 foizni tashkil etgan. Natijada umumiy pul massasidagi naqd pullar ulushi 2019 yil davomida 27,6 foizdan 26,6 foizgacha pasaygan. Aholi omonatlarining umumiy depozitlardagi ulushi 25 foizdan 31 foizgacha ko`payib, ularning hajmi 20,6 trln. so`mga etgan.
Mazkur tendensiya aholining bank tizimiga bo`lgan ishonchi asta-sekinlik bilan ortib borayotganligidan hamda pul-kredit siyosati choralarining iqtisodiyotdagi jamg`arish faolligiga ijobiy ta`sir ko`rsatayotganligidan darak beradi, deyiladi Markaziy bank hisobotida.