— Boquvchisini yo`qotganlik pensiyasini olmoqchi edim. Buning uchun kerakli hujjatlar ro`yxati bilan tanishtirsangiz, iltimos...
Anbarali Akramov, Farg`ona viloyati Quvasoy tumani
Farrux SULAYMONOV, Byudjetdan tashqari Pensiya jamg`armasi ijro etuvchi apparat bo`lim boshlig`i o`rinbosari:
— Boquvchisini yo`qotganlik pensiyasini tayinlashni so`rab murojaat qilgan shaxsning arizasiga quyidagi hujjatlar ilova qilinishi kerak:
► Pensiya tayinlanayotgan shaxsning pasporti;
► Oila a`zosining vafot etgan boquvchi bilan qarindoshlik munosabatlarini tasdiqlovchi hujjatlar (nikoh to`g`risidagi guvohnoma...);
► Vafot etganlik to`g`risidagi guvohnoma nusxasi;
► Vafot etgan boquvchining ish stajini tasdiqlaydigan hujjat (mehnat daftarchasi...);
► Vafot etgan boquvchining ish haqi to`g`risidagi ma`lumotnoma.
Bulardan tashqari, zarur hollarda boshqa hujjatlar talab etilishi mumkin.
Misol uchun:
► Oila a`zolari 16-18 yoshdagi o`quvchilar hisoblanishi to`g`risidagi ma`lumotnomasi;
► Tegishli organ tomonidan berilgan harbiy xizmatni, partizan otryadlari va qo`shilmalarda bo`lganlikni, davlat xavfsizligi organlarida va ichki ishlar organlarida xizmat qilganlikni tasdiqlaydigan ma`lumotnoma;
► Oliy ta`lim muassasalarida, aspiranturada, doktoranturada va klinik ordinaturada, tayanch doktoranturada va doktoranturada kunduzgi o`qishni tasdiqlaydigan diplom yoki ma`lumotnoma va boshqalar..
Tahririyat: Fuqaroni qiziqtirgan masalada ham talab qilinadigan hujjatlar sonini qisqartirish vaqti kelmadimikan-a?
Sadoqat ALLABERGANOVA
