Karantin nima maqsadda qo`llaniladi? Qanday sharoitda uyda, qanday sharoitda stasionar tartibda amalga oshiriladi?
Davlat Bosh sanitariya inspektori Nurmat Otabekov mazkur savollarga javob berdi:
"Karantin tadbirlarining ushbu kasallik tarqalgan paytda qanchalik muhim ahamiyatga ega ekanini biz o`z boshimizdan o`tkazdik. O`zbekistonga kasallik tarqalgan hududlardan kelgan 4 nafar odam bilan muloqotda bo`lgan 19 kishida ushbu kasallik aniqlandi.
Bundan ko`rinib turibdiki, biz dastlabki kunlardan karantin tadbirlarini o`tkazganimiz o`z samarasini berdi. Agar 19 bemorni vaqtida karantinga olmaganimizda bu kasallikni yanada ko`proq odamga yuqtirgan bo`lar edilar.
O`zbekiston hududida ikki xil karantin amal qiladi. Qachonki O`zbekistonga fuqarolari kasallik tarqalgan hududdan uyushgan holda olib kelinadigan bo`lsa, karantin stasionar holatda, yakka tartibda olib kelinsa, uy sharoitida karantinga olinadi.
Karantin nima degani? Karantin bu — cheklov. Kasallikning yashirin davrida cheklov e`lon qilinadi va tibbiy nazoratga olinadi. Qachonki, koronavirus yo`q ekaniga ishonch hosil qilinsa, u odam karantindan ozod qilinadi.
