“O`zbekneftgaz” AJ Boshqaruvi raisi Mehriddin Abdullaevning topshirig`iga asosan, tizimdagi neft bazalar faoliyatini o`rganish uchun “Ishchi guruh” tuzildi.
Jamiyat Matbuot xizmatining ma`lum qilishicha, “Ishchi guruh” a`zolari tomonidan ming nafardan ortiq ishchi-xodim faoliyat yuritadigan, yirik neft bazalardan biri bo`lgan “Maroqand neft bazasi”da neft mahsulotlarining to`kib olinishi, yuklanishi, saqlanishi, avtomatlashtirish, yong`in xafsizligi qoidalariga rioya etilishi hamda karantin qoidalariga amal qilish holatlari o`rganildi.
O`rganish jarayonida “Maroqand neft baza”si faoliyatida bir qator kamchiliklar borligi aniqlandi. Jumladan, neft bazada ishchi yordamchisi, bog`bon, buxgalter kabi 109 ta ortiqcha shtat birliklari borligi qayd etildi.
Ayrim mas`ullarga intizomiy choralar ko`rilishi belgilandi.
“Bulung`ur”, “Jomboy”, “Nurobod”, “Zirabuloq” va “Ziyovuddin” kabi filiallar orqali fermerlar, tadbirkorlar, klasterlarga xizmat ko`rsatadigan “Maroqand neft bazasi” 2020 yilning 1-yarim yilligini zarar bilan yakunlagan.
Shuningdek, neft baza tomonidan klasterlar bilan hamkorlik qilish juda sust tashkil etilgan. Pastdarg`om tumanidagi “Amin Invest Interneyshnl” va Oqdaryo tumanidangi “Koreya Samarqand” MChJ klaster korxonalariga neft mahsulotlari etkazib bermagan hamda bu borada mutloqo shartnoma imzolanmagan.
O`znavbatida ta`kidlash kerakki, ayrim klasterlar ham neft bazalar bilan mutloqo shartnoma imzolashmagan.
“Ishchi guruh” Qarshi neft bazasi” MChJ faoliyatini ham o`rgandi va ushbu neft bazasida ham kamchiliklar aniqlandi. Jumladan, yong`in xavfsizligi, obodonlashtirish hamda avtomatlashtirish sohasida bir qator ishlar amalga oshirilmagan.
O`z vaqtida bu kamchiliklarni bartaraf etmagan hamda bunga yo`l qo`yib bergan mas`ullarga qat`iy jazo choralari ko`rildi.
Bundan tashqari, tadbirkorlar tomonidan belgilangan tartib asosida vagon sisternalarni qabul qilib olish, mahsulotlarni to`kib olinishi, yuklanishi va saqlanishi texnika, yong`in hamda mehnat xavfsizligi qonun qoidalariga amal qilinmagan holda, manzilli temir yo`l bekatlarining ma`lum bir qismida, avtosisternalar orqali to`kib olish va yuklash jarayonlari amalga oshirilayotgani ham aniqlandi.
Joylarda xo`jalik yurituvchi sub`ektlar lisenziya talablariga rioya qilmagan holda temir yo`l bekatlarida neft mahsulotlarini avtosisternalarga to`kib olish holatlari turli darajadagi yong`in falokatlarini va baxtsiz hodisalarning kelib chiqishiga sabab bo`lmoqda.
“Maroqand neft bazasi”da bo`lgani kabi bu erda ham ortiqcha shtat birliklari mavjud bo`lib, kadrlar masalasida ishlar tartibga solinmagan.
“Ishchi guruh” tomonidan olib borilayotgan o`rganish ishlari “O`zbekneftgaz” AJ Boshqaruvi raisining nazoratida bo`lib, har bir holat yuzasidan axborot berib turilibdi.
