Францияда мамлакатнинг йирик касаба уюшмалари уюшмаси томонидан пенсия ёшини 64 ёшга кўтаришга қарши оммавий иш ташлаш ва норозилик намойишлари бошланди. Ташкилотчилар режасига кўра, митинглар Франциянинг 215-250 шаҳрида ўтказилиши керак, деб ёзган Ouest-France газетаси.
Нашрнинг ёзишича, иш ташлашда, хусусан, таълим, транспорт ва энергетика соҳалари ходимлари, олий ўқув юртлари талабалари ва ўрта мактаб ўқувчилари иштирок этган. Франция ҳукумати фуқароларни метро фаолиятида юзага келиши мумкин бўлган носозликлар, поездлар ва самолётлар қатновининг бузилиши ҳақида огоҳлантирмоқда. Le Figaro нашрининг ёзишича, Францияда электр энергияси ишлаб чиқариш қисқариши мумкин, чунки энг йирик давлат ишлаб чиқарувчи EDF компанияси ишчилари ҳам иш ташлашмоқда.
Нашрларнинг қайд этишича, иш ташлашлар вақтида жамоат тартибини ҳимоя қилиш учун Франция ҳуқуқ-тартибот идоралари 10 мингдан ортиқ полициячини сафарбар этади.
Маълумот учун: 10 январь куни Франция ҳукумати 2030 йилдан бошлаб энг кам пенсия ёшини 62 ёшдан 64 ёшга кўтаришни режалаштираётганини маълум қилди. Янги пенсия ёши 1961 йил сентябрь ойидан кейин туғилган фуқаролар учун қўлланилади. Bloomberg маълумотларига кўра, расмийлар 2023 йил 1 сентябрдан бошлаб пенсия ёшини босқичма-босқич оширади.
