Мамлакатда ташқи иқтисодий босим оқибатларини юмшатишга қаратилган икки йиллик режа ишлаб чиқилган. Бу ҳақда Эрон иқтисод ва молия вазири Сайед Али Маданизода 24 август куни давлат телеканалига берган интервьюсида маълум қилди.
Маданизоданинг айтишича, Теҳрон АҚШнинг янги чекловларини узоқ вақтдан бери кутиб келган ва уларга қарши зарур чораларни олдиндан ишлаб чиққан.
“Ҳукуматда икки йиллик режа бор ва унда юзага келиши мумкин бўлган барча ҳолатлар ҳисобга олинган”, деган вазир.
Унинг таъкидлашича, Вашингтон Эрон иқтисодиётининг асосий “томирлари”ни узиш орқали ўз мақсадига эриша олмайди. Маданизода АҚШнинг янги чораларини иқтисодий босим сифатида баҳолаб, Теҳрон бунга жавоб чораларига эга эканини айтган.
Вазир, шунингдек, аввалги уруш оқибатида мамлакатнинг пўлат ва нефт-кимё саноатига жиддий зарар етганини қайд этди. Унинг сўзларига кўра, зарар кўрган корхоналарни қайта ишга тушириш ва тиклаш ишлари олиб борилган.
Бу орада АҚШ Эронга нисбатан иқтисодий босимни кучайтирди. АҚШ Молия вазири Скотт Бессент 24 август куни Теҳрон билан иқтисодий алоқаларни сақлаб қолаётган давлатлар ва компанияларга нисбатан иккиламчи санкциялар қўлланиши мумкинлигидан огоҳлантирди. Вашингтоннинг таъкидлашича, Эрон билан савдо муносабатларини давом эттирувчилар АҚШ долларига асосланган халқаро молиявий тизимдан четлатилиши мумкин.
Шунингдек, АҚШ Молия вазирлиги Эроннинг санкцияларни четлаб ўтишда фойдаланаётган деб ҳисобланган рақамли активлар, технологиялар, олтин, авиация ва денгиз ташувлари соҳаларига нисбатан иккиламчи санкциялар қўллаш имкониятини маълум қилди.
АҚШнинг янги чоралари доирасида жами 60 нафар шахс, ташкилот ва кемага нисбатан санкциялар эълон қилинган.
Теҳрон эса Вашингтоннинг янги санкциялари мамлакат иқтисодиётини издан чиқара олмаслигини билдирмоқда. Эрон расмийлари санкцияларга жавоб чоралари кўрилиши мумкинлигини ҳам истисно қилмаяпти.
