Мусобақанинг финалида Асаубаева украиналик гроссмейстер Мария Музичук билан куч синашиб, ҳар икки партияда ҳам ғалаба қозонди — 2:0. Шу тариқа, у турнирнинг рапид дастурида чемпионликни қўлга киритди.
Асаубаева ғалабадан сўнг ўзининг Instagram саҳифасида мусобақадаги иштироки ва таассуротлари билан ўртоқлашди.
“Бугунги иш куним тугади. Мен WR Chess Tour мусобақасининг рапид қисмида ғолиб бўлдим. Биринчи ўйинда Пётцни, иккинчисида Батсиашвилини, учинчисида эса Мария Музичукни мағлуб этдим. Эртага блиц. Бироз чарчадим, лекин ўзимдан мамнунман. Бундан ташқари… пошнада 6 соат. Ҳа, тамом”, — деб ёзди шахматчи.
Асаубаева чорак финалда Германия вакили Элизабет Пётцни, ярим финалда эса грузиялик Нино Батсиашвилини мағлуб этган. Ҳар икки босқичда ҳам ғолиб қўшимча Армагеддон партияси орқали аниқланган.
Қозоғистонлик шахматчи бу билан мусобақадаги иштирокини якунламайди. Бугун, 26 август куни Сен-Тропеда турнирнинг блиц дастури старт олади ва Асаубаева унда ҳам чемпионлик учун курашади.
