"Рома"нинг бир неча юз нафар мухлислари "Бавария" билан учрашувни томоша қилиш учун Мюнхенга учиш олдидан аэропортда ҳакам Жанлука Роккини учратиб қолиб, уни ҳақоратларга кўмиб ташладилар.
Ёдингизда бўлса, Рокки 5 октябрь куни А-сериясининг 6-тури доирасида "Рома"нинг "Ювентус"га қарши ўйинини бошқариб борган ва ўша ўйин римликларнинг 2:3 ҳисобидаги мағлубияти билан тугаган эди. Рокки "Рома" дарвозаси томон иккита пенальти белгилангани қаттиқ танқидларга учраган.
Ҳакам Брюсселга учиб кетиш учун аэропортда самолёт кутиб турган вақтда "Рома" фанатлари уни мазах қилиб қўшиқлар айтишди ва ҳақоратлар ёғдиришди. Оқибатда ишга полиция аралишишига тўғри келди.
