Қаршида содир бўлган ЙТҲда 9 киши жароҳатланди

Кеча Қашқадарёда “Ласетти” ва “Нексия” иштирокида ЙТҲ содир бўлди. Бу ҳақида ИИВ ҳузуридаги Тергов департаменти хабар берди. Йўл-транспорт ҳодисаси оқибатида тўққиз нафар шахс тан жароҳатлари олган.
Аниқланишича, 31 октябр куни соат 21-40 да фуқаро Н.Х. ўзининг бошқарувидаги фуқаро Ш.Ж.га тегишли “Ласетти” русумли автомашинасини ишончнома орқали Қарши-Еттитом 4Р87 автомобил йўлининг Еттитом йўналиши бўйлаб бошқариб бораётиб, ушбу йўлнинг 50 километрида, қарама-қарши йўналишдан ҳаракатланиб келаётган фуқаро Р.З. бошқарувидаги МЧЖга тегишли “Нексия” русумли автомашинани йўлига чиқиб кетган ҳолда, йўл-транспорт ҳодисасини содир қилган.
Натижада “Нехиа” автомашина ҳайдовчиси Р.З. ва йўловчилар С.У., Э.Р., С.К.лар ҳамда “Ласетти” автомашина ҳайдовчиси Н.Ҳ. ва йўловчилар Д.С., М.Р., Г.Н., Н.Н.лар тан жароҳатлари олиб шифохонага мурожаат этишган.
Мазкур ҳолат юзасидан Қарши туман ИИБ ҳузуридаги Тергов бўлими томонидан терговга қадар текширув ҳаракатлари ўтказилмоқда ва натижасига кўра Жиноят-процессуал кодексининг 329-моддаси тартибида қонуний қарор қабул қилиниши таъминланади.