Toshkent erusti halqa metrosining birinchi bosqichi ishga tushdi. Prezident Shavkat Mirziyoev bugun bu erga tashrif buyurib, jamoatchilik bilan birga poezdda yurdi, deb xabar bermoqda Prezident.uz.
«Do`stlik-2» bekatidan «Qo`yliq» bekatigacha bo`lgan mazkur yo`nalish uzunligi 11 kilometr bo`lib, 7 ta bekat barpo etilgan. Ushbu yo`nalish kuniga 46 ming yo`lovchiga xizmat ko`rsatish imkoniyatiga ega.
«Qo`yliq» bekatida keyingi bosqichlar qurilishi bo`yicha taqdimot o`tkazildi.
Birinchi bekatdan oxirgisigacha 19 daqiqada etib olish mumkin. Bu masofada har biri 4 ta vagondan iborat 4 ta poezd qatnaydi. Ushbu yo`nalish kuniga 46 ming yo`lovchiga xizmat ko`rsatish imkoniyatiga ega.
Bekatlar milliy kolorit asosida, o`ziga xos dizaynda qurilgan. Ular yo`lovchilarga qulaylik yaratuvchi zamonaviy texnologiyalar, yo`l kira haqini elektron to`lash imkonini beruvchi turniketlar, eskalator bilan jihozlangan. 225 ta yangi ish o`rni yaratilgan.
Erusti halqa metrosi loyihasining umumiy qiymati 422 million dollardan ziyod bo`lib, beshta bosqichda amalga oshirilishi rejalashtirilgan. Ikkinchi bosqichda Qo`yliq bozori bilan Toshkent erosti metrosining “Olmazor” bekati bog`lanadi. Uchinchi bo`lib “Beruniy”, undan keyin “Bodomzor” bekatigacha bo`lgan qism quriladi. So`nggi bosqichda esa halqa metro liniyasi yana “Do`stlik” bekatiga ulanadi. Bu yo`llarning jami uzunligi qariyb 55 kilometr, bekatlar 35 ta bo`ladi.
