Suyuq tuz. Bu haqida ilk bor eshitayotganimiz bois, qiziqishimiz ustunlik qilib, Navoiy viloyatiga qilgan tashrifimiz chog`ida Konimex tumanida joylashgan tuz mahsulotlari qatorida suyuq tuz ham ishlab chiqaruvchi “Shojon tuz group” korxonasiga tashrif buyurdik. Karantin davrida, ya`ni 2020 yil 29 aprelda ishga tushirilganligi bilan ham ahamiyatli korxona 50 nafar ishsizni, shu jumladan, 15 nafar “temir daftar”ga kiritilgan oila a`zolarini ham ishga qabul qilgan. Adog`i ko`rinmas cho`l yalangligida qurilgan korxonada O`zbekistonda ilk marotaba jahon standartlariga to`la javob beradigan tuzdan qayta ishlangan mahsulotlar ishlab chiqarilmoqda. Bugun “qalovini topib, qorni ham yoqqan” tadbirkorning ham o`ziga, ham o`zgalarga berayotgan ko`magi haqida so`z yuritamiz.
Nima uchun suyuq tuz?
“Shojon tuz group” korxonasi ish boshqaruvchisi Sadriddin Shukurovning ta`kidiga ko`ra, suyuq tuzdan tekstil korxonalarida matoni bo`yash maqsadida foydalaniladi. Bugungi kunda O`zbekistonda ilk bora suyuq tuz aynan shu erda ishlab chiqarilmoqda. Bundan tashqari korxonada tuz toshlar va tuz qumlari qayta ishlanib, eksportbop osh tuzi va suv havzalari quvurlarini tozalashda ishlatiladigan tuz tabletkalari ham ishlab chiqarilayotganining guvohi bo`ldik. Tuman markazidan 30 km uzoqlikdagi “Zafarobod” MFYda joylashgan “Shojon tuz group” MChJ loyihasining umumiy qiymati 17 mlrd. so`mni tashkil etadi. Yil oxiriga qadar korxona 80 ming AQSh dollarlik mahsulotni ekport qilishni rejalashtirgan.
“temir daftar”ga kiritilgan bir oila bugun 4-5 million so`m oylik daromadga erishgan
Imkoniyati bor hududlar o`z yo`liga, ammo cho`l hududida yangi ishlab chiqarish korxonasi va ishchi o`rinlarini yaratishning o`zi katta bir tashabbus. Mazkur korxonada ishlovchi Baxtibay Baymuratov ham “temir daftar”ga kiritilgan oilalar ro`yxatidan chiqarilish arafasida. Sababi korxona tashkil etilgandan buyon u turmush o`rtog`i bilan birga shu erda ishlaydi.
“3 oydan beri shu korxonada brigadir bo`lib ishlayapman. Oyligim “plan”ga qarab 3,5-4 mln. so`m. Bundan tashqari ayolim ham shu erda ishlaydi. U ham 1-1,5 mln. so`m maosh olyapti. Oilaviy daromadimiz oylik 4-5 mln. so`mga etdi. Endi bemalol “temir daftar” ro`yxatidan chiqsak bo`ladi”, - deydi Baxtibay Baymuratov.
Xulosa o`rnida
Kambag`allikka qarshi kurashish davlat siyosatiga chiqqan bugungi kunda bu siyosat ijrosi sifatida “temir daftar”ga kirgan bir oilaning bugunga kelib mo`may daromadga erishayotganini ko`rish albatta quvonarli hol. Bu kabi tashabbus va loyihalari bilan katta ishlar qilayotgan tadbirkorlarimiz esa mamlakatimizda talaygina. Muhimi, ular tadbirkorlar uchun yaratilayotgan sharoitlardan to`laqonli foydalanib, kambag`allik darajasining qisqarishida o`zlarining munosib hissalarini qo`shishmoqda.
Sardorbek Rahmonqulov
