Viloyatlar bo`ylab kambag`allikka qarshi kurashish, “temirdaftar” yuritish bo`yicha olib borilayotgan ishlarni o`rganish jarayonida turli toifadagi insonlarga duch kelyapmiz. Kimdir imkoniyatlardan to`laqonli foydalanib o`z moliyaviy ahvolini tiklab olayotgan bo`lsa, yana kimdir davlatning “erkatoyi”ga aylanib borayotganini ham ko`ryapmiz. Bugungi qahramonlarimiz ham har ikki toifadagi hamyurtlarimizdir. Har bir fuqaroni tinglar ekansiz, ularning ham o`z haqiqatlari borligini tushunishga urinasiz. Xo`sh, ularning “haqiqatlar”ini siz qanday qabul qilasiz? Keling, har ikki yurtdoshimizning taqdiriga bir razm solamiz.
Nogiron bo`lsa-da, boqimanda emas!
Ozoda Jabborova, 2-guruh nogironi:
— 3 opa-singil 15 yildan beri tikuvchilik qilamiz. Davlatdan turli ko`rinishda yordam va nafaqalarni olib turaman. Lekin shu bilan cheklanib qolganim yo`q. Oldin tikuv mashinam yo`q edi. Shahar hokimligi tomonidan menga tikuv mashinasi olib berildi. Doimiy buyurtmam bo`lib turishi uchun shahar “Don mahsulotlari birlashmasi”ga meni biriktirib qo`yishdi. Hozirda mahalladagi buyurtmalarimdan tashqari birlashma uchun kunlik 20-30 ta paxta terish uchun etaklar tikib beryapman.
Ozodadek yurtdoshlarimizni ko`rib, entikib ketasan kishi. Davlatning “yordam pullari”ga qarab qolmasdan harakat qilib, o`z tadbirkorligi bilan shug`ullanib, ham o`ziga, ham jamiyatga foydasi tegyapti.
“Bu ishlar menga to`g`ri kelmaydi”
Samarqand shahar “Toj mahal” mahallasiga borganimizda esa butunlay boshqacha vaziyat guvohi bo`ldik. Mahallada yashovchi “temir daftar”ga kiritilgan 45 yoshli Abdurasul Berdiqulov unga taklif qilinayotgan ishlardan norozi:
“Men buxgarterlik mutaxassisligi bo`yicha o`rta-maxsus bilim yurtini tamomlaganman. Shu paytgacha xususiy korxonada qorovul bo`lib ishlaganman. Menga taklif qilinayotgan ishlar yoshimga to`g`ri kelmaydi. Nuqul yuk tashuvchilik ishlarini menga taklif qilishyapti. Biror korxonada yo`qmi hisob-kitobli ishlar, mutaxassisligim bo`yicha ishlasam?” – deydi Abdurasul aka buxgalterlik faoliyati bo`yicha tajribaga ega bo`lmasa-da.
Unga taklif etilgan ishlarni surishtirsak, ular orasida tekstil fabrikalarida engil qutilarni qadoqlash ishlari ham borligini ko`rdik. Qahramonimiz esa bu kabi ishlarni “menga to`g`ri kelmaydi” deya rad qilib kelgan. Pandemiya sharoitida hatto rivojlangan davlatlarda ham yuz minglab ish o`rinlari yo`qolayotgan bir paytda ishning o`zi uyiga kelib turgan Abdurasul akadek yurtdoshlarimizning “o`z haqiqati” qanchalik haqiqatga yaqin? 1-qaxramonimiz Ozoda ish tanlamasdan, o`z mehnatiga suyanib, hammasidan rozi bo`lib turgan paytda bu kabi e`tirozlar ko`ngilni xira qiladi. Nima ham deymiz. Besh barmoq barobar emas. Aytgancha, shahar 2-sektor ko`magi bilan Abdurasul Berdiqulovning turmush o`rtog`i va 19 yoshli qizi doimiy ishga joylashtirilgan.
Samarqand shahrida ish bilan ta`minlanganlik darajasi qanday?
Shahar hokimligi taqdim etgan ma`lumotlarga ko`ra shaharda mehnatga layoqatli ishsiz fuqarolar 4 792 nafarni tashkil qilib, bugunga qadar ularning jami 3 661 nafari yoki 76 foiz bandligi ta`minlangan.
Jumladan:
Yordamga muhtoj oilalarga o`zini o`zi band qilish maqsadida jami 79 ta tikuv mashinalari olib berilgan.
Sardorbek Rahmonqulov
