Bugun AOKAda Koronavirusga qarshi kurash shtabi a`zosi Barno Abdusamatova ishtirokida brifing o`tkazildi. Unda koronavirus infeksiyasi profilaktikasi borasidagi savollarga javob qaytarildi.
Savol: Bog`cha va maktab xodimlari farzandimiz tez-tez shamollovchi toifaga kiradigan bo`lsa, onlayn o`qishini taklif etishyapti. Bolalarning barchasi tez-tez shamollaydiku, xo`sh, qanday toifadagi bolalar xaqida so`z yuritilmoqda. Koronavirus kasalligi immunitetiga bog`liq deyilyaptiku, tushuntirib bersangiz?
–Bolalar kasallikka qarshi kurashish qobiliyatini (immunitet) homila davrida onadan oladi. Immunitet har bir organizmda individual shakllangan bo`ladi.
Bir yoshgacha bo`lgan chaqaloqlarda esa immunitet ona organizmidan ona suti orqali o`tadi va shuning natijasida bolada tabiiy immunitet hosil bo`ladi. Bu esa bolani turli kasalliklardan himoya qiladi.
Tug`ilgandan so`ng bolada sun`iy immunitet hosil bo`lishi uchun bola profilaktik tarzda emlanadi. Natijada bola organizmida turli xil infeksion kasalliklarga qarshi immunitet paydo bo`ladi.
Shuning uchun birinchi navbatda homiladorlikni rejalashtirishdan avval ona o`z salomatligini tiklashi va sog`lom farzand dunyoga keltirishi uchun qayg`urmog`i kerak. Onaning salomatligi, homiladorlik davrini yaxshi kayfiyatda o`tkazishi bolaning sog`lig`i uchun muhimdir.
1 yoshdan bola kasallikka qarshi kurashish qobiliyatini o`zi shakllantira boshlaydi. Uning organizmini salomatligiga qarab kasallikka qay tarzda uchrashi va uni kechirishi immunitetiga bog`liq bo`ladi.
Bolada immunitetni qay darajada bo`lishi bir qator sabablarga bog`liq. Jumladan:
✔️ ona salomatligi;
✔️homiladorlikning kechishi;
✔️ irsiy kasalliklar;
✔️bolaning rivojlanishi;
✔️ona suti bilan oziqlanishi;
✔ turmush tarzi va hokazo.
Immunitet qay tarzda shakllanganligi bola turli infeksiyaga duch kelganda namoyon bo`ladi, ya`ni u bog`chaga borib, boshqa bolalar bilan aloqada bo`lganida.
3 yoshgacha bo`lgan bolalar yiliga 4 martadan ko`p, 3 yoshdan yuqori bo`lgan bolalar yiliga 6 martadan ko`p respirator kasalliklar ya`ni O`RVI (o`tkir respirator virusli infeksiya), gripp, bronxit kabi kasalliklar bilan kasallansalar bunday bolalar tez-tez kasallanuvchi bolalar guruhiga kiradilar.
Yana go`dakda kamqonlik aniqlangan bo`lsa (qonda gemoglobin miqdorining kamayib ketishi) immunitet tizimi ish faoliyatini susaytiradi. Bunday bolalar shifokor nazoratida bo`lishlari va surunkali kasalliklari bo`lsa ularni muntazam ravishda davolatib turishlari zarur.
