Xolis fikr koronavirus bilan kurashib, bu dard hamlasidan omon chiqqan mashhur oshpaz Bahriddin Chustiyning kasalxonadagi taassurotlarini e`lon qildi. Oshpaz o`zining bir oydan oshiq vaqt davom etgan shifoxonadagi hayoti ikkiga bo`linganini aytadi.
“Birinchi yarmi “KIP” (NIIEMIZ) infeksiya markazi shifoxonasi va u erdagi shifokorlarga nisbatan “o`zgacha” fikr va munosabat bo`lsa. Ikkinchi yarmi 16-shahar markaziy shifonasi va shifokorlarga nisbatan umuman aksincha munosabat hosil bo`ldi. Bu erda nafaqat menga, balki har bir bemorga alohida, o`zgacha e`tibor, oddiy kadam qo`yishda ham bemorning yuragi va oyoqlarida tromb bo`lmasligi uchun bintlab, bir necha shifokorlar nazoratida qadam bostirishmoqda.
Oldingi KIP shifoxonasida esa tamomila aksincha edi. Uch kunda bir u bo`limdan bu bo`limga kislorodsiz, shifokor nazoratisiz, hamshiralar aravada eshik oldiga tashlab ketishar edi. 3-qavatga bitta zina ko`tarilib, so`ngra o`tirib, bir soatda chiqar edim”, deb yozadi.
Oshpazning aytishicha, bemorlar tuzalmasdan turib, kasalxona rahbariyati ularga javob berib yuborishmoqda: “Eng qizig`i, hali to`liq davolamay turib bo`lim boshlig`i Natalya Batirovna ikki marta menga javob berib yuborgani, birichi marta hushimdan ketib ikki kunga qoldirishgan. Ikki kundan so`ng esa maksimal kislorod bilan satursiya 77, istima 38,5 bo`lib turgan paytda, yana o`sha bo`lim boshlig`i Natalya Batirovna ukamga telefon qilib, “akangga allaqachon javob bo`lgan, sizlarni chiqarib yuborish uchun Milliy gvardiyani chaqirish kerakmi? Qo`limda bosh vrach Jaloliddin Tuychiev qo`l qo`ygan qog`ozlar turibdi. Biz uni davolab bo`ldik. Endi uning kasali ruhiy, unga psixolog kerak”, deb dag`dag`a qilgan. Vaholanki, o`sha paytda psixolog emas, kislorod kerak edi”.
Chustiyning e`tirof etishicha, bir qancha yaxshi insonlarning tashabbusi bilan 16-shahar markaziy shifonasiga o`tkazilgan va bu erdagilar tom ma`noda uning joniga aro bo`lishgan.
Mana, ayrim shifoxonalardagi real ahvol, kasallarga munosabat. Hammaning ham Chustiy kabi dasti uzun tanishlari yo`qligi aniq. Tibbiyotimizdagi tanish-bilishchilik yo`qotilmas ekan, soha botqoqqa botib ketaveradi.
