Ijtimoiy tarmoqlarda Mirobod tumanida joylashgan 31-maktabda o`quvchi va o`qituvchi o`rtasida yuzaga kelgan video tarqaldi. Unda o`qituvchining o`quvchiga qo`l ko`targanligi aks etgan va “Nima sababdan o`quvchiga qo`l ko`targan o`qituvchi rag`batlantirilib, sinf rahbarlik berildi?" degan savol qo`yilgan.
Toshkent shahar XTBB Matbuot xizmati holat tafsilotlarini ma`lum qildi.
Mirobod tumani 31-maktabda yuz bergan mazkur hodisa joriy yilning mart oyida sodir bo`lgan. Ma`lum bo`lishicha maktabda ingliz tili o`qituvchisi Sanjarova Gulzananing qizi va videoda kaltak egani aks etgan qiz Yugay Milana o`rtasida jiddiy nizo yuzaga keladi. O`qituvchi Milanaga o`qituvchisi sifatida emas kaltaklangan farzandini himoya qilayotgan ona sifatida qo`l ko`targan.
Direktor Nuriya Semmarining ma`lum qilishicha, mazkur holat yuzasidan 23 iyun kuni sud bo`lib o`tgan va o`qituvchiga nisbatan jarima jazosi qo`llanilgan.
"Sanjarova Gulzana maktabimizda bir yarim yildan buyon faoliyat yuritayotgan yosh mutaxassislardan. Sud unga nisbatan o`zining adolatli qarorini chiqarib bo`lgan. Gulzana va uning oilasi o`quvchining oilasidan uzr so`rab, mazkur holatdan afsusdaligini bir necha bor izhor qilgan. Sud o`z qarorini chiqargan ekan men rahbar sifatida o`qituvchiga o`zimcha hukm chiqarishim noto`g`ri. Agar zarur bo`lganida yuqori Sud hokimiyati uni pedagogik faoliyat bilan shug`ullanishdan chetlashtirgan bo`lardi deb hsoblayman. Bir inson o`z qilmishiga yarasha jazosini oldi. Bugun qizning xolasi o`qituvchini ishdan bo`shatib yubormaganim sababli ushbu videoni tarqatib yuborishga qaror qilgan. Men maktab rahbari sifatida bugun yaxshi ingliz tili o`qituvchisini topish oson emaslgini inobatga olgan holda o`qituvchining faoliyatini davom ettirishida hech qanday yomon tomoni yo`q deb hisoblayman”, — deydi Nuriya Semmari.
