Pnevmoniyada banka va xantal (gorchichnik)ni qo`llash samara beradimi?

Pnevmoniyada banka va xantal (gorchichnik)ni qo`llasa bo`ladimi? Samarasi bormi? Bu savolga Koronavirusga qarshi kurash shtabi a`zosi Sevara Ubaydullaeva javob berdi.

 Aslida pnevmoniyada banka va xantal (gorchichnik)ni qo`llash tavsiya etiladi. Biroq bugungi kunda koronavirus infeksiyasi keltirib chiqarayotgan pnevmoniya, ya`ni, zotiljam kasalligida bunga hojat yo`q. 

Banka va xantal bakteriyali va zamburug`lar chaqirgan pnevmoniyalarda, o`pka hamda bronxlarda katta miqdorda balg`amlar paydo bo`lganda, uni parchalash hamda tashqariga chiqarishda yordam berish uchun fizioteraptik muolaja sifatida tavsiya etilgan. Qolaversa, u faqatgina kasallikni tuzalish jarayonida qo`llaniladi.

 Biroq bugungi koronavirus kasalligida yo`tallar asosan quruq va balg`amsiz yo`tal kuzatilyapti. Koronavirus infeksiyasida hech qanday banka va xantallar va hattoki ingalyasiyalar ham tavsiya etilmaydi. Imkon qadar bunday terapiyalardan saqlangan ma`qul. Bunday muolajalar quruq yo`talni yanada kuchaytirib yuborishi mumkin.