Tojikiston rahbariyati tegishli ishchi guruhga 2021 yilda Rog`un GES qurilishini moliyalashtirish manbalarini topish bo`yicha aniq choralar ko`rish haqida topshiriq berdi. Bu haqda mamlakat Energetika va suv resurslari vazirligi xabar qilmoqda.
Joriy yilning oktyabr oyi o`rtalarida Tojikiston Respublikasi Prezidenti Imomali Rahmon ushbu stansiya quruvchilari bilan uchrashuvda 2008 yildan buyon stansiya qurilishiga 25,3 milliard somoniydan ko`proq mablag` ajratilganligini ta`kidladi.
“Faqatgina 2020 yilda qurilish ishlariga davlat byudjetidan qariyb 3 milliard somoniy ajratiladi”, - dedi u.
Avvalroq, Rog`un GESni qurib bitkazish uchun 2,1 milliard somoniy miqdorida byudjet mablag`larini ajratish rejalashtirilganligi haqida xabar berilgan edi.
Moliya vazirligi ma`lumotlariga ko`ra, joriy yilning birinchi yarmida ushbu stansiyada ob`ektlarni qurish uchun 1,3 milliard somoniy miqdorida byudjet mablag`lari ajratildi.
Ayni paytda, Rog`un GES loyihasidan tashqari, mamlakat energetika sohasida qiymati 13,3 milliard somoniydan ortiq bo`lgan qo`shimcha 12 ta davlat investisiya loyihalari amalga oshirilmoqda.
2018 yil noyabr va 2019 yil sentyabr oylarida foydalanishga topshirilgan Rog`un GESning ikkita gidroagregati ishga tushirilgandan buyon, joriy yilning sentyabr oyigacha 1,7 milliard kVt.soat dan ortiq elektr energiyasi ishlab chiqarildi.
Umuman olganda, Rog`un GES mashina zalida 600 MVt quvvatli oltita gidroagregatni turbinalar bilan jihozlash rejalashtirilgan.
Hozirda 12,7 mingdan ziyod quruvchi 3824 ta mashina va mexanizmlardan foydalangan holda Rog`un GESni qurish ishlarini davom ettirmoqda.
Rog`un GESni 2033 yilgacha to`liq qurib bitkazilishi kutilmoqda. Rog`un to`liq ishga tushirilgandan so`ng, u erda o`rtacha yillik elektr energiyasi ishlab chiqarish hajmi 17 milliard kVt.soat dan oshadi.
