Qoraqalpog`iston Respublikasi Nukus shahrida O`zbekiston Respublikasi innovasion rivojlanish vazirligi va «Sho`rlanish sharoitida biodehqonchilik xalqaro markazi»ning (ICBA, BAA) Markaziy Osiyo va Janubiy Kavkaz bo`yicha Toshkent shahridagi mintaqaviy vakolatxonasining tashabbusi va qo`llab-quvvatlashi bilan O`zbekiston Respublikasi Prezidenti huzuridagi Orolbo`yi xalqaro innovasiya markazi bilan hamkorlikda «Ijtimoiy innovasiyalar va ijtimoiy tadbirkorlik dasturlari orqali yoshlarning imkoniyatlarini kengaytirish» mavzusida seminar o`tkazildi.
Seminar Innovasion rivojlanish vaziri Ibrohim Abdurahmonov va Qoraqalpog`iston Respublikasi Jo`qorg`i Kengesi raisi Murat Kamalov raisligida o`tdi. Tadbirda seminar tashkilotchilari vakillari bilan birga Qoraqalpog`iston Respublikasi Jo`qorg`i Kenesi va Vazirlar Kengashi, tegishli vazirlik va idoralar, ilmiy-tadqiqot institutlari, oliy ta`lim muassasalari vakillari ishtirok etishdi.
– Har bir soha kabi ijtimoiy soha ham innovasiyalarga muhtoj, – dedi vazir. – Avvallari echilmayotgan muammolarni hal etish yoki echimini taqdim etarkanmiz, mazkur echimlar shu hududda istiqomat qilayotgan aholining manfaatlaridan kelib chiqishi, ularning talablariga javob berishini e`tiborga olishimiz kerak .Yaqin kunlarda biz Qoraqalpog`iston Respublikasi bo`yicha ilmiy faoliyatga oid hududiy dasturlar doirasida shakllantirilgan 26 ta amaliy va innovasion loyihalar mavzularini e`lon qilamiz. Ushbu loyihalar tanlovlari g`oliblariga jami 39 mlrd so`mdan oshiq mablag` ajratilgan. Bu mablag`lar ilm-fanning turli yo`nalishlarida faoliyat yuritayotgan olimlarning ilmiy taqiqot ishlariga berilarkan, ushbu tadqiqotlar natijasida, deylik ma`lum iqtisodiy, ijtimoiy va ekologik muammolarning hal bo`lishi kutilmoqda.
Tadbirda bugungi kunda Qoraqalpog`iston Respublikasida iqtisodiyot va ijtimoiy sohalar hamda tarmoq ilmiy-tadqiqot muassasalari o`rtasida o`zaro hamkorlikni rivojlantirish, ilmiy-intellektual hamda moliyaviy resurslarni to`liq safarbar etgan holda ilmiy-innovasion salohiyatdan keng foydalanish, zamonaviy bilimga ega va mustaqil fikrlaydigan yuqori malakali kadrlarni tayyorlash zaruriyati haqida fikrlar bildirildi. O`z navbatida Davlat ilmiy-texnik dasturlari doirasida ilmiy loyihalar tanlovini e`lon qilish maqsadida Qoraqalpog`iston Respublikasi Jo`qorg`i Kengashi va O`zbekiston Respublikasi Innovasion rivojlanish vazirligi o`rtasida hamkorlik ishlari yangicha yondashuvlarni joriy qilish va ilmiy tadqiqot ishlanmalarni qo`llab-quvvatlashga qaratilgan.
Shuningdek, Qoraqalpog`iston Respublikasida yosh innovatorlarni qo`llab-quvvatlash va iqtisodiy sohani rivojlantirish maqsadida Innovasion rivojlanish vazirligi va Sho`rlanish sharoitida biodehqonchilik xalqaro markazi (IKBA) bilan birgalikda o`tkazilgan «Orol dengizi mintaqasining sho`rlangan erlarida Innovasion startap loyihalar tanlovi» natijalariga ko`ra saralab olingan eng yaxshi loyihalar moliyalashtirilayotgani mintaqaning ekologik va ijtimoiy muammolarini hal etishga xizmat qiladi.
Nukusda bo`lib o`tayotgan seminar doirasida Innovasion rivojlanish vaziri Ibrohim Abdurahmonov O`zbekiston Respublikasi innovasion rivojlanish vazirligi va Sho`rlanish sharoitida biodehqonchilik xalqaro markazi (BAA) bilan hamkorlikda e`lon qilingan «Orol dengizi sho`rlangan erlarida innovasion startap loyihalari tanlovi»ning Qoraqalpog`istondagi g`oliblariga tantanali ravishda sertifikatlar topshirdi. Polat Jaylibaevning «Orolbo`yida baliqchilikni rivojlantirish, shuningdek yo`qolib ketish xavfi ostida turgan baliq turlarini tiklash» loyihasi 400 mln. so`m, Rustamjon Madraimovning «Quyosh energiyasida ishlaydigan saksovul ekish agregatini ishlab chiqarish» loyihasi 338,2 mln. so`m, Abilay Koptleuovning «Agrolotok» loyihasi 300 mln. so`m, Alim Asamatdinovning «Orolbo`yi cho`l zonasini ko`kalmzorlashtirish uchun bio-parchalanuvchi to`r va urug`larni kapsulalash» loyihasi 334 mln. so`m miqdorida moliyalashtirilishi belgilangan.
