Kecha, 16 fevral kuni Buxoro viloyat Turizmni rivojlantirish departamenti direktori Suhrob Bobokalonov va mustaqil rejissor Grek Polk va uning rafiqasi-USAIDning O`zbekistondagi vakolatxonasi(AQSh Xalqaro taraqqiyot agentligi) rahbari Rebekka Blek bilan uchrashuv bo`lib o`tdi. Bu haqda Buxoro Viloyat Turizmni rivojlantirish departamenti xabar qildi.
O`zbekiston Respublikasining AQShdagi Elchixonasi bilan hamkorlikda hujjatli filmlarning mustaqil rejissori Grek Polkning joriy yil 12-24-fevral kunlari Buxoro viloyatiga tashrifi belgilangan edi.
Ushbu tashrifdan ko`zlangan maqsad Buxoro aholisining tarixiy-madaniy turmush tarzi, mahalliy o`ymakorlik va to`quvchilik bilan shug`ullanuvchi hunarmandlar hamda Buxoro va Santa-Fe (Nyu-Meksiko shtati, AQSh) shaharlari o`rtasidagi birodarlik aloqalari haqida bo`lib, mazkur film 2021-yil 7-18-iyul kunlarida tashkil etiladigan "Xalqaro milliy san`at bozori" (lnternational Folk Art Market, IFAM) yarmarkasida namoyish qilinishi rejalashtirilgan.
12 fevral kuni shahrimizga tashrif buyurgan Grek Polk Buxoro bilan tanishdi.
Unda rejissyorning Buxoro viloyatiga tashrifi davomida departamentning o`z vakolati doirasida amaliy yordam berilishi, 1,5 soatlik hujjatli film syomkalari haqida so`z bordi.
Uchrashuv so`ngida mehmonlarga viloyat turizmni rivojlantirish departamenti tomonidan milliy o`zligimizni ifoda etadigan sovg`alar taqdim etildi.
Filmning syomka jarayonlari bugun 16 fevral kuni boshlandi.
