"O`zbekkino" Milliy agentligi Rossiyaning "Masterskaya" kinokompaniyasi bilan hamkorlikda “O`zbekiston. Yangilanayotgan tarix” hujjatli filmi ustida ishlamoqda. Bu haqda “O`zbekkino” Milliy agentligi Axborot xizmati ma`lum qildi.
O`zbekiston Respublikasi Prezidenti Sh.Mirziyoevning 2020 yil 20 noyabr kuni “O`zbekfilm” kinostudiyasiga tashrifi davomida berilgan topshiriqlari ijrosi yuzasidan suratga olinayotgan ushbu film O`zbekiston Respublikasi Mustaqilligining 30 yilligiga bag`ishlanadi. Unda yurtimizda amalga oshirilayotgan iqtisodiy va ijtimoiy islohotlar haqida hikoya qilinadi.
Film ijodkorlari joriy yilning fevral oyida tasvirga olish ishlari bilan Toshkent shahriga tashrif buyurishdi.
Shu o`rinda ta`kidlab o`tish joizki, “Masterskaya” kinokompaniyasi Rossiyaning eng yirik hujjatli filmlar ishlab chiqaruvchi tashkiloti hisoblanadi. Kinokompaniya tomonidan ishlab chiqarilgan filmlar “ORT” hamda “Rossiya” telekanallari orqali namoyish etib boriladi.
