Metroning Sergeli yo`nalishida, “Novza” va “G`afur G`ulom” bekatlarida elektropoezdning to`xtab qolgani, Sergelida ikki poezdning to`qnashib ketgani, shuningdek, Chilonzor yo`nalishidagi “Pushkin” va “Buyuk ipak yo`li” bekatlari oralig`ida metro vagoni eshigini yopmasdan harakatlanganiyu, kecha elektr o`chib qolgani... So`nggi ikki oy ichida Toshkent metropolitenida kuzatilayotgan bu kabi holatlar sababi nimada? Nega oxirgi paytlar ular tez-tez sodir bo`lyapti? 1977 yilda ochilgan Toshkent metropolitenida ilgari bunday vaziyatlar kuzatilmaganmi yoki oshkor qilinmaganmi? Kecha 7 may kuni Toshkent metropoliteniga qilingan press-tur chog`ida mana shunday savollarga javob olishga urindik.
“Bu – texnika. Uning risoladagidek ishlashiga hech kim kafolat bera olmaydi. Nosozliklar bo`lib turishi tabiiy. Muhimi, bu kabi holatlarni bartaraf etish bo`yicha ishchi guruh tuzilib, qisqa muddatda ular bartaraf qilinyapti”, - deydi Toshkent metropoliten unitar korxonasi rahbari Oybek Xudoyqulov.
— Deyarli 40 yil mobaynida kuzatilmagan holatlar nega so`nggi 2 oyda tez-tez kuzatilyapti?
— 40 yil mobaynida bu holatlar ommaviy axborot vositalarida olib chiqilmagan. Poezd to`xtab qolish holatlari, eshiklar ochilmay qolish kabi holatlari bo`lgan, lekin yaqin kunlardagi kabi vahimali holatlar kuzatilmagan. Xozir hammaning qo`lida telefon. Tasvirga olmanglar demayapmiz. Yurtdoshlarimiz surat, videolar olishib, holatni o`zlari istagancha talqin qilib, tarqatib yuborishmoqda. Favqulodda vaziyatlarda yo`lovchilarni tunnel bo`ylab olib chiqish ham butun jahonda kuzatiladigan holat.
— Eshik ochiq qolgan holat-chi?
— To`g`ri. Eshik ochilib qolgan holat kuzatildi. Vagon eshiklari g`ildirak aylanishi hisobiga ochilib-yopiladi. Balki, biror narsa g`ildirakni to`xtatib qolgandir. Yoki boshqa sababi bordir. Bunday vaziyatlarda jamoatchilik nazorati ham muhim. Agar yo`lovchilar bu kabi holatga guvoh bo`lsalar, har bir vagonda o`rnatilgan tugmachani bosib, mashinistga xabar berishlari maqsadga muvofiqdir.
— Zamon tezkorlik talab qiladi. Balki, bunga rasmiy munosabatning kechiktirilayotgani sabab bo`layotgandir. O`z vaqtida holatga oydintik kiritilsa, vaziyat engillashmaydimi?
— O`z vaqtida munosabat bildiryapmiz. Mana, masalan, kecha sodir bo`lgan holat bo`yicha bugun munosabat berildi.
— Lekin bu juda kech.
— ...
Shuningdek, Oybek Xudoyqulov hamyurtlarimizni tekshirilmagan ma`lumotlarni tarqatmaslikka chaqirdi:
“Metroda biror narsa sodir bo`lsa, bu haqida o`sha zahoti metropoliten hodimlaridan izoh olish mumkin. Savol bilan ularga yuzlansa, javob berishadi. Ba`zi hollarda vaziyat umuman boshqacha talqin qilinyapti. Masalan, kuni kecha ikkita poezdning qo`shilgan holda turganini kameraga olib, poezd kelib urildi deb tarqatishdi. Vaholanki, Chorsu bekatida boshlangan ishni Beruniy metro bekatiga borganda tasvirga olishgan. 5–6 kilometr yurib kelayotgan tarkibni bir oz vahimali qilib tarqatishgan. Yana bir holat: Eng oxirgi bekat — Buyuk Ipay yo`li, Beruniy, Olmazor, Do`stlik bekatlarimizda kechqurun qoladigan tarkiblar keladi-da, ertangi yo`liga tushib olish uchun chiqib-kirib harakatlanadi. Bu 365 kun qilinadigan “manyovr”. Bu bizning ishimiz. Hatto shuni ham tasvirga olib, o`sha erdagi xodimlardan bir og`iz tushuntirish so`ramasdan internetga chiqarib yuborishyapti”.
Ma`lumot uchun, Toshkent halqa erusti metro yo`lining 2-bosqichi Qo`yliq bozoridan Toshkent shahrining Mirobod hamda Sergeli tumanidan o`tgan Katta halqa yo`li, Toshkent viloyatining Zangiota tumanidagi Xonobod ko`chasi hamda Sergeli tumanining Qipchoq ko`chasidan o`tib, Sergeli liniyasining 5-bekatiga ulanadi hamda Yangi hayot tumaniga etkaziladi. 15 kilometrlik umumiy uzunlikka ega ushbu uchastkada 9 ta bekat qurish rejalashtirilgan.
Shuningdek, rejaga ko`ra Toshkent halqa erusti metropoliteni liniyasining umumiy uzunligi 54,8 kilometrdan iborat bo`lib, mavjud O`zbekiston, Sergeli, Chilonzor hamda Yunusobod yo`nalishlariga to`g`ridan-to`g`ri ulanadi.
Sardorbek RAHMONQULOV suhbatlashdi
