Rossiya Federasiyasining Sankt-Peterburg shahridagi I. Mechnikov nomidagi Shimoliy-sharqiy davlat tibbiyot universiteti klinikasi endovaskulyar xirurgiya bo`limi rahbari, tibbiyot fanlari nomzodi Aleksandr Kaledin tomonidan 2016 yilda bemorning distal bilak tomiridan kirib jarrohlik amaliyotini olib borish usuli yaratilgan.
Namangan viloyatiga tashrif buyurgan kashfiyotchi shifokor-olim rentgen-endovaskulyar jarrohlik amaliyotini “Mahorat darsi” sifatida olib borib, o`n nafardan ziyod bemorni og`ir darddan xalos etdi. Jumladan, Namangan tumanida yashovchi, “Temir daftar”dagi ro`yxatga kiritilgan Ozoda Tursunovaga imtiyozli ravishda tibbiy xizmat ko`rsatildi.
Rossiyalik mutaxassis RIKIATMning viloyat filiali shifokorlari ishtirokida o`tkazilgan ko`rgazmali anjumanda kardiologik kasalliklarni davolashning zamonaviy usullari haqida ma`ruza qildi. Savol-javoblar chog`ida esa tibbiyotning mazkur yo`nalishiga oid dolzarb muammolarni birgalikda xal etish yuzasidan fikrlashib olindi.
– Filialimiz ilmiy salohiyati juda yuqori, ya`ni tibbiyot fanlari nomzodlari va fan doktorlari xizmat qilishadi. Ko`plab mutaxassislarimiz chet elda malaka oshirishgan. Shu bois ham ilmiy izlanishlarga, jahon tibbiyoti yutuqlarni dadillik bilan qo`llashga alohida urg`u beryapmiz. Rus ixtirochi-shifokori Aleksandr Kaledinning tashrifi faoliyatimizning yangi qirralarin ochishga imkon yaratdi, - deydi filial direktori, tibbiyot fanlari nomzodi Solijon Mo`minov.
Darhaqiqat, viloyat kardiologlarining chet ellardagi hamkasblari bilan hamkorligi doirasi tobora kengayib bormoqda. Rossiya Fanlar Akademiyasi A.N. Bakulev nomli Kardiologiya ilmiy-amaliy tibbiyot markazi, E. N. Meshalkin nomli Kardiologiya va kardiojarrohlik markazi, Qozog`iston Milliy kardiologiya markazi va boshqa davlatlardagi etakchi ilmiy markazlar bilan aloqalar samarasi o`laroq kardiologiya va kardioxirurgiya, intervension kardiologiya sohasini takomillashtirishda yutuqlarga erishilmoqda.
Binobarin, yurak tug`ma nuqsonlarini okklyuder yordamida bartaraf etish, murakkab qon-tomir shkastlanishlarida retrograd usullarida angioplastika va stentlash, pereferik qon tomirlari diagnostikasi va angioplastikasi, biklapanli protezlash, klapanlar plastikasi, aorta ravog`ida protezlash, MSKT arteriografiya va koronarografiya kabi yuqori texnologik jarrohlik amaliyotlari tatbiq etilgan. Endi bunday yuqori texnologik amaliyotlar soni yana bittaga ko`paydi. Umid qilamizki, bu oxrgisi emas, albatta.
