So`ngi kunlarda koronavirusga chalingan bemorlar ichida pnevmoniya holatlari ortmoqda. Ularning organizmida pnevmoniyadan so`ng turli o`zgarishlar kuzatilmoqda. Sog`liqni saqlash vazirligi huzuridagi Koronavirusga qarshi kurash shtabi a`zosi Nargiza Nurillaeva avj olayotgan bu kasallik ta`sirlari haqida so`z ochdi:
— Pnevmoniya bilan kasallangan organizmning tiklanishi oson jarayon emas. Bu o`pkaning shikastlanish darajasi va intoksikasiya bilan bog`liq bo`ladi. Pnevmoniyada kislorod va nafas etishmovchiligi kuzatiladi. Shuning uchun tiklanish jarayoni bir qancha vaqt talab etadi.
Pnevmoniyadan so`ng kuzatilgan noxushlik va kuchli holsizlik temir tanqisligi bilan bog`liq bo`lishi mumkin. Temir moddasi yallig`lanish jarayonlarida organizmda faol qatnashadi. Bundan tashqari, surunkali yurak etishmovchiligida, buyrak etishmovchiligi kabi xolatlarda ham kuzatilishi mumkin. Bunday holatlarda davolovchi shifokor bilan maslahatlashish zarur. Bemor holatidan kelib chiqib, mos bo`lgan preparatni qabul qilish tavsiya etiladi.
Doimiy hansirash pnevmoniyadan tashqari quyidagi kasalliklarda kuzatilishi mumkin:
- Yuqori nafas yo`llari va o`pka kasalliklari;
- yurak kasalliklari;
- qon kasalliklari;
- kamharakat hayot tarzi (bunda biroz jismoniy harakatdan so`ng ham hansirash paydo bo`lishi mumkin);
- O`RVI yoki boshqa infeksion kasalliklar fonida.
Hansirash jiddiy belgi hisoblanadi, shuning uchun siz tashxisni aniqlashtirish maqsadida shifokorga murojaat
qilishingiz zarur!
