Yurtimizda har faslning o`z ziynati bor. Kuz fasli tabiatni oltin rangga burkab, o`ziga xos zavq bag`ishlaydi. Bu kezlarda tovlanib turgan tabiat go`zalligi rassomlarga ham ilhom manbai bo`ladi. Tabiat bag`rida ranglar ko`p.
O`zbekiston Badiiy akademiyasining ma`lum qilishicha, ijodkorlar uyushmasi Toshkent viloyati bo`limi a`zolari Soliy Qodirov, Robert Kim, uyushmaga a`zolikka nomzod Bakirboy O`rmonov ,Chirchiq davlat pedagogika instituti talabasi Aziza Bakirova hamda Badiiy akademiya tasarrufidagi Respublika ixtisoslashtirilgan dizayn maktabi o`quvchilari Sevinch Mo`minova, Zarina Boboqulova “ustoz va shogird” an`anasi asosida Toshkent viloyatining Bo`stonliq tumanidagi Qoronko`l qishlog`i atrofida plenerga chiqib, etyud chizishdi.
Plener so`nggida chizilgan etyudlar haqida fikr almashildi. Ustoz rassomlar yoshlarga o`zlarining qimmatli maslahatlarini berishdi.
Shu kuni plener ishtirokchilari rassom, BIU a`zoligiga nomzod B. O`rmonovning ijodiy ustaxonasiga borib, asarlari bilan tanishishdi.