"Men rahbar bo`lib ishlasam, bunday bo`lmaydi" – Shavkat Mirziyoev migrantlarga soliq solish to`g`risidagi taklifga munosabat bildirdi

Prezident Shavkat Mirziyoev 16 oktyabr kuni Toshkent viloyatiga tashrif buyurdi. Bu haqda Prezident Matbuot xizmati xabar berdi. 

Tashrif davomida Shavkat Mirziyoev Milliy tiklanish partiyasidan Prezidentlikka nomzod Alisher Qodirovning chet eldagi o`zbek migrantlariga soliq solish to`g`risidagi taklifiga munosabat bildirdi. Prezident bu gaplar asossiz ekanini aytdi.

"Viloyatdan chet elga ketib, mehnat qilayotgan fuqarolarimiz imkon qidirib ketishgan. Imkon qidirgan odam fidoyi odam bo`ladi. Ijtimoiy tarmoqlarda chetda yuradiganlarni daromad solig`ini tortish haqida gap chiqdi. Bu mutlaqo asossiz gaplar. Men, Xudo nasib qilib, rahbar bo`lib ishlasam, bunday bo`lmaydi. Ular o`ziga va oilasiga imkon yaratyapti, o`zini ish bilan ta`minlayapti, oilasini boqyapti. Ularni men o`z farzandlarim deb bilaman. O`tgan vaqtda biz ham ularni qo`llab-quvvatlash uchun choralar ko`ryapmiz.  

Vazirlar Mahkamasi huzurida alohida departament ochildi. Ularning hayoti va sharoitini yaxshilash, kasbga o`rgatish uchun harakatlar qilinyapti.  

Aholimizga murojaat qilib aytmoqchiman: ko`nglingiz to`q bo`lsin, O`zbekistonda sizga imkon yaratish, (xorijda) to`layotgan coliqlaringizni kamaytirishga harakat qilamiz. Migrasiya masalasi bo`yicha Rossiya hukumatiga ko`p murojaat qilyapmiz.  

Davlat, millat, prezident ularga otalik qilishi vazifadir.  Ularning og`irini engil qilishga harakat qilamiz. O`ylaymanki, bu adolat namunasi bo`ladi",– dedi amaldagi davlat rahbari.