O`zbekiston Respublikasi Prezidenti Shavkat Mirziyoev 12 noyabr kuni tongda Istanbul shahrida o`tayotgan Turkiy kengash sammiti doirasida o`ziga ajratilgan qarorgohda Qirg`iz Respublikasi Prezidenti Sadir Japarov bilan uchrashuv o`tkazdi. Bu haqda Prezident Matbuot xizmati xabar bermoqda.
Ma`lum qilinishicha, davlat rahbarlarining joriy yil mart oyida Toshkentda o`tgan uchrashuvi chog`ida erishilgan kelishuvlarni amalga oshirish masalalari ko`rib chiqildi.
Savdo-iqtisodiy hamkorlik barqaror sur`at bilan rivojlanib borayotgani mamnuniyat bilan qayd etildi.
Tovar ayirboshlash va yuk tashish hajmlari ortmoqda, aviaqatnovlar ko`paymoqda. Mashinasozlik, elektrotexnika, energetika, qishloq xo`jaligi, logistika va boshqa tarmoqlarda, shu jumladan yangidan tashkil etilgan Qo`shma investisiya jamg`armasi resurslarini jalb qilgan holda istiqbolli kooperasiya loyihalari ishlab chiqilmoqda.
Madaniy almashinuvlar kengaymoqda, muhim gumanitar dasturlar amalga oshirilmoqda.
“Xitoy – Qirg`iziston - O`zbekiston” temir yo`lini qurish loyihasini jadal ilgari surishga alohida e`tibor qaratildi.
Shuningdek, mintaqaviy hamkorlik, shu jumladan Turkiy tilli davlatlar hamkorlik kengashi doirasidagi sheriklikning dolzarb masalalari yuzasidan fikr almashildi.
