O`zbekiston Respublikasi Transport vazirligi tomonidan “Uzbekistan Airports” aksiyadorlik jamiyati ishtirokida “e- Freight” yuk tashuvlarini elektron rasmiylashtirish axborot platformasini joriy etish va elektron hujjatlardan foydalangan holda “yagona darcha” rejimida nazorat-tekshiruv funksiyalarini amalga oshirish masalalariga bag`ishlangan seminar bo`lib o`tdi. Bu haqda O`zbekiston Transport vazirligi Axborot xizmati ma`lum qildi.
Ta`kidlanishicha, bugungi kunda O`zbekistonda aviayuklarni tashish sohasida elektron hujjat aylanmasiga o`tishga hozirlik ko`rilmoqda. Qator vazirlik va idoralar vakillari uchun xalqaro ekspertlar ishtirokida o`tkazilgan ushbu seminar mazkur jarayonni amalga oshirish bo`yicha “yo`l xaritasi”ning birinchi bosqichi bo`ldi.
“O`zbekistonga har kuni yuzlab tonna turli xil yuklar etkazib beriladi. Yuklar bilan birga tonnalab hujjatlar ham kelib tushadi. Bir tovar uchun o`rtacha 20 ga yaqin turli ruxsatnomalar rasmiylashtiriladi. Elektron hujjat aylanmasiga o`tish nafaqat millionlab daraxtlarni saqlab qolish, balki tovarlarni etkazib berish jarayonini soddalashtirish va tartib-taomillarni imkon qadar shaffof qilish imkonini beradi. e- Freight – bu IATA tomonidan tavsiya etilgan va dunyoning ko`plab mamlakatlarida qabul qilingan xalqaro standart. Mazkur platformaning O`zbekistonda joriy etilishi xorijiy logistika kompaniyalari va aviatashuvchilar uchun aeroportlarimiz raqobatbardoshligi va jozibadorligini sezilarli darajada oshiradi”, — deydi “Uzbekistan Airports” AJ Boshqaruvi raisi Ra`no Djuraeva.
Seminar doirasida ekspertlar e- Freight standartini joriy etish bo`yicha xalqaro tajriba va natijalar, davlat chegarasi orqali o`tish punktlarida nazorat-tekshiruv funksiyalarini amalga oshirish texnologiyasini o`zgartirish borasida talablar, shuningdek aviatashuvlarga oid elektron hujjatlarni rasmiylashtirish va yuritish amaliyoti haqida so`z yuritdilar.
