Toshkent va O`zbekistonning boshqa shaharlarida elektr ta`minotidagi uzilish munosabati bilan aeroportlar faoliyati vaqtincha to`xtatildi. Bu haqda "Uzbekistan airpots" xabar bermoqda.
Xususan, Toshkent aeroportida Toshkent – Nur-Sulton yo`nalishi bo`yicha HY-721 reysining barcha yo`lovchilari ro`yxatdan o`tish, shuningdek, bojxona va pasport nazorati va xavfsizlik tekshiruvidan o`ta olmadi. 60 ga yaqin yo`lovchi steril zonada, 30 ga yaqin odam ro`yxatga olish zonasida. Elektr ta`minotidagi uzilish tufayli yo`lovchilar xavfsizlik tekshiruvidan o`ta olmaydi. Keyingi chora-tadbirlar “O`zbekiston havo yo`llari” tomonidan amalga oshiriladi.
HY-762 reysi Olmaota – Toshkent Navoiydagi muqobil aerodromga yo`l oldi. Shuningdek, Air Astana aviakompaniyasining Olmaota-Toshkent yo`nalishi bo`yicha KC-127 reysi ekipaji jo`nab ketgan aeroportga qaytishga qaror qildi.
Shuningdek, Namangan, Andijon, Farg`ona, Termiz, Qarshi, Urganch, Buxoro, Nukus va Samarqand aeroportlarida elektr energiyasi bilan bog`liq muammolar kuzatilmoqda. Ayni paytda elektr energiyasi faqat Navoiy aeroportida mavjud.
