Ayni paytda Prezident raisligida bo`lib o`tayotgan videoselektor yig`ilishida avtomaktablar faoliyati va imtihon olish jarayonlari tanqid ostiga olindi.
"Yildan yilga avtotransport vositalari va haydovchilar soni ko`paygani bilan ularning madaniyati, o`zaro hurmat va bilim-tajribasi pasayib borayotgani ham ayni haqiqat.
Masalan, avariyalarning 75 foizini 35 yoshgacha bo`lganlar sodir etgan. Har yili 500 ming kishi haydovchilik guvohnomasi oladi, lekin 25 foizi mashg`ulotlarga qatnashmaydi.
Qaysi hokim yoki ichki ishlar boshlig`i biror marta avtomaktablarga borgan, ulardagi o`qish jarayoni bilan qiziqqan? Umuman, Ta`lim inspeksiyasi avtomaktablar nazoratini eplay olmadi”, - dedi davlat rahbari.
Qayd etilishicha, endi haydovchilikka o`qitish va guvohnoma berish bo`yicha yangi tizim yaratiladi. Bunda:
- Ichki ishlar vazirligi avtomaktablar va imtihon markazlariga talablarni qayta ko`rib chiqadi, ularga lisenziyalarni o`zi beradi;
- Ichki ishlar akademiyasi avtomaktablarning metodologiyasi, o`quv dasturi, o`qituvchilarning malakasi va o`qitish sifatini oshirishga javob beradi;
- Yo`l harakati xavfsizligi boshqarmasi haydovchilar to`g`risidagi ma`lumotlar bazasi va ularning reytingini yuritadi.
