“Yuksalish” umummilliy harakati O`zbekiston jamoatchiligining tinchlik qadriyatiga bo`lgan munosabati darajasini aniqlash maqsadida ekspertlik so`rovini o`tkazdi.
Unda 720 kishi — hududlarda tashkil etilgan mustaqil monitoring va baholash jamoatchilik guruhlari a`zolari, NNTlar rahbarlari va faollari, biznes, akademik hamjamiyat va OAV vakillari ishtirok etdi. Ishtirokchilar O`zbekistonning barcha hududlaridan birdek qamrab olindi.
Natijalar tahlili shuni ko`rsatdiki, harbiy harakatlar o`zbekistonliklarda qayg`u va qo`rquvni uyg`otadi.
O`zbekistonning faol jamoatchiligi nafaqat o`z yurtida, balki butun dunyoda tinchlik bo`lishini yoqlaydi. So`rovning aksariyat ishtirokchilari, ya`ni 672 nafari yoki 93,3 foizi “Men butun dunyoda tinchlik bo`lishini istayman” javobiga to`liq qo`shilgan. Qatnashchilarning 27 nafari (3,8 foiz) O`zbekistonda, 21 nafari (2,9 foiz) Markaziy Osiyoda tinchlik bo`lishini istaydi.
