Vazirlar Mahkamasining “Dori vositalari va tibbiy buyumlarni majburiy raqamli markirovkalash tizimini joriy etish to`g`risida”gi qaroriga muvofiq, dori vositalari va tibbiy buyumlarni ishlab chiqarish, olib kirish va qonuniy aylanishini ta`minlash uchun majburiy raqamli markirovkalash tizimi joriy qilinadi va 2022-2025 yillar davomida bosqichma-bosqich amalga oshiriladi.
Markirovkalash muddati, dori vositalari va tibbiy buyumlar turlari alohida ko`rsatib o`tilgan.
Masalan, birinchi guruhda, ikkilamchi (tashqi) qadoqlarda ishlab chiqarilgan dori vositalari (orfan dori vositalari bundan mustasno) – 2022 yil 1 senyabrdan;
ikkinchi guruh – birlamchi (ichki) qadoqlarda ishlab chiqarilgan dori vositalari (agar ikkilamchi (tashqi) o`ram mavjud bo`lmasa) va dorivor angro – mahsulotlari (orfan dori vositalari bundan mustasno) – 2022 yil 1 noyabrdan;
uchinchi guruh – Sog`liqni saqlash vazirligi tomonidan tasdiqlanadigan kam uchraydigan kasalliklarni davolash uchun mo`ljallangan orfan dori vositalari hamda kam uchraydigan (orfan) kasalliklarga tashxis qo`yish va ularni davolash uchun mo`ljallangan tibbiy buyumlar ro`yxatiga kirgan, shuningdek, O`zbekiston Respublikasi hududidan tashqarida amalga oshirilgan ro`yxatga olish natijalarini tan olish tartibi doirasidagi dori vositalari, tibbiy buyumlar va tibbiyot texnikasining Davlat reestriga kiritilgan dori vositalari – 2023 yil 1 fevraldan;
to`rtinchi guruh – belgilangan tartibda tasdiqlangan ro`yxatga kiritilgan tibbiy buyumlar – 2025 yil 1 fevraldan boshlab joriy qilinadi.
Shuningdek, dori vositalari va tibbiy buyumlarni markirovkalash tartibi joriy qilingan kundan boshlab, uch yildan ko`p bo`lmagan muddatda ishlab chiqarilgan dori vositalari va tibbiy buyumlarni, ularning yaroqlilik muddati tugagunga qadar, raqamli identifikasiyalash vositalarisiz realizasiya qilishga;
mahalliy ishlab chiqaruvchilarga 90 kun ichida dori vositalari va tibbiy buyumlarni majburiy markirovkalash tartibi joriy qilingan kunga qadar ishlab chiqarilgan (qadoqda ko`rsatilgan sana) va raqamli markirovkalanmagan holda sertifikasiyadan o`tkazishga;
xorijiy ishlab chiqaruvchilarga 180 kun ichida dori vositalari va tibbiy buyumlarni majburiy raqamli markirovkalash tartibi joriy qilingan kunga qadar ishlab chiqarilgan (qadoqda ko`rsatilgan sana) va raqamli markirovkalanmagan mahsulotni sertifikasiyadan o`tkazish hamda “erkin muomalaga chiqarish (import)” bojxona rejimiga rasmiylashtirishga ruxsat beriladi.
Tashqi ishlar vazirligiga bu haqda xorijiy davlatlarni xabardor qilish vazifasi yuklatilgan.
