O`zbekiston Respublikasi Prezidenti Shavkat Mirziyoevning 2021 yil 25 dekabr kuni “Uzbekistan GTL” zavodiga tashrifi davomida bergan topshiriqlari ijrosini ta`minlash maqsadida, “O`zbekneftgaz” AJ Boshqaruv raisi Mehriddin Abdullaev boshchiligida “Sho`rtan” koni shtabida sayyor yig`ilish o`tkazildi.
Tadbirda “O`zbekneftgaz” AJ, “O`zLITIneftgaz” AJ, Davlat geologiya qo`mitasi, “O`zbekgeofizika” AJ va IGIRNIGM davlat muassasasi kabi korxonalarning mutaxassislari, shuningdek quduqlarni burg`ilash hamda qazib chiqarish boshqarmalarining mutaxassislari, muhandislar, geolog va geofiziklar ishtirok etishdi.
Dastlab “O`zbekneftgaz” AJ tomonidan 2022 yilning I choragida bajarilgan neft va gaz geologiya-qidiruv ishlari, zaxiralarni ko`paytirish, yangi maydonlarni burg`ilashga kiritish hamda ularning kelgusi istiqbolli yo`nalishlari, erishilgan natijalar, mavjud muammolar va ularning echimlariga doir takliflar batafsil muhokama qilindi.
2022 yilning o`tgan davrida “O`zbekneftgaz”AJ bo`yicha 445 kv.km 3D seysmik-qidiruv ishlari bajarildi, “Cho`lliota” maydoni burg`ilashga kiritildi va jami 31,0 ming metr burg`ilash ishlari olib borildi.
Buning natijasida “Niyoz” – yangi gazkondensat koni ochilishi bilan birgalikda 2,0 mlrd.m3 tabiiy gaz va 100 ming tonnadan ortiq suyuq uglevodorod zaxiralari ko`paytirildi.
Tadbirda 2022 yilda “O`zbekneftgaz” AJ va Davlat geologiya qo`mitasi hamkorligida amalga oshirilayotgan neft va gaz geologiya-qidiruv ishlari ko`rib chiqildi.
Qo`mita va uning tarkibidagi tashkilotlar bilan birga Respublikada neft va gaz geologiya-qidiruv ishlarini rivojlantirishning asosiy yo`nalishi sifatida Qoraqalpog`iston Republikasi hududi belgilab olinganligi, Ustyurt mintaqasida neft va gaz geologiya-qidiruv ishlari bo`yicha yangi tabdirlarni loyihalashtirish, ularni maqsadli amalga oshirish, tabiiy gazning yangi konlarini ochish hamda qo`shimcha zaxiralarini aniqlash eng ustuvor vazifa ekanligi qayd etildi.
Ushbu maqsadlarda hozirda “O`zbekneftgaz” AJning Ustyurtdagi boshqarmalarida joriy yil boshidan buyon 60 dan ortiq qo`shimcha ish o`rinlari yaratilganligi va ularga “Qo`ng`irot” va “Mo`ynoq” kabi tumanlarning yoshlarini burg`ilovchi, texnik, mexanik, muhandis yordamchisi sifatida ishga qabul qilinayotganligi qayd etildi.
Soha mutaxassislariga Ustyurt hududida neft va gaz geologiya-qidiruv ishlarini yanada jadallashtirish uchun qo`shimcha –texnik quvvatlari yuqori burg`ilash uskunalarini jalb qilish va regiondagi 4500 metrdan ortiq chuqurlikdagi katta istiqbollarni o`rganish hamda uglevodorod xom ashyosi zaxiralarini keskin ko`paytirish bo`yicha aniq topshiriqlar berildi.
Shuningdek, Ustyurtda qo`shimcha hududlarni o`rganish va yangi maydonlarni topish, natijada Respublika bo`yicha neft va gazga istiqbolli strukturalar defisitini bartaraf etish bo`yicha tadbirlar ishlab chiqildi.
O`zbekiston Respublikasi Prezidentining PQ-154 sonli qarori ijrosini ta`minlash maqsadida Geologiya fanlari Universitetida “O`zbekneftgaz” AJ homiylik mablag`lari hisobidan neft va gaz yo`nalishida yangi laboratoriya tashkil qilish va uni 1,0 mln. dollarlik 13 turdagi uskuna va laboratoriya jihozlari bilan ta`minlash masalalari ko`rib chiqildi.
Shu bilan birga Universitet va uning tarkibidagi institutlar bilan birgalikda 2022-2023 yillarda 19 ta ilmiy loyihalar bo`yicha ishlarni tashkil qilish, ularda Universitet o`qituvchilari va talabalarningsh ishtiroki, kutilayotgan natijalar va ularning samaradorligi kabi masalalarga alohida e`tibor qaratilib mas`ullarga zarur ko`rsatmalar berildi.
Qarordagi topshiriqlar ijrosini ta`minlash maqsadida, “O`zbekneftgaz” AJ, Davlat geologiya qo`mitasi va uning tarkibidagi tashkilotlar xodimlaridan iborat qo`shma “Ishchi guruh” tashkil qilinib, mas`ullarning vazifalari aniq belgilab berildi.
Tadbir davomida Boshqaruv raisi burg`ilash ishlari hamda uglevodorod qazib chiqarish jarayonlarida yo`l qo`yilgan kamchiliklarni ham tanqidiy muhokama qilib, tegishli rahbar va mutaxassislarga ularni bartaraf etish, material-texnik resurslar ta`minotini tezkor hal qilish hamda qisqa muddatlarda tadbirlar samaradorligini keskin oshirish bo`yicha ham zarur ko`rsatmalar berdi.
Bundan tashqari, kelgusi besh yillikda “O`zbekneftgaz” AJ bo`yicha 10 200 kv.km.3D seysmik ishlarni bajarish, 100 dan ortiq yangi maydonlarni o`zlashtirish, 950 ming metrdan ortiq burg`ilash ishlarini bajarish, 310 dan ortiq quduqlarni qurilish bilan tugatish va natijada 180 mlrd.m3 atrofida tabiiy gaz hamda 6,5 mln.tonnadan ortiq suyuq uglevodorod zaxiralarini o`stirish maqsad qilinganligini, ularni to`liq bajarish eng asosiy vazifa ekanligini ta`kidlab o`tdi.
“O`zbekneftgaz” AJ tomonidan Ustyurt, Qashqadaryo va Buxoro mintaqalaridagi yangi neft va gazga istiqbolli maydonlarni o`zlashtirish, uglevodorodlarning yangi zaxiralarini aniqlash hamda ularni qazib chiqarishni samarali tashkil etishga qaratilgan chora-tadbirlarni amalga oshirishda davom etmoqda.
