Sevimli

"Qora quti"dagi Yulduz hayotda ham ishqdan kuyganmi?

Shou-biznes 05.06.2022, 15:00
"Qora quti"dagi Yulduz hayotda ham ishqdan kuyganmi?

“Sevimli” telekanalida efirga uzatilayotgan, reytingi yuqori seriallardan biri “Qora quti”ni kechki dasturlarda o`tkazib yubormayapsizmi? Turkiyalik ssenarist tomonidan yozilgan, katta mablag` tikilgan serialning voqealar rivoji qizg`in avj olgan. Bugun biz “Yulduz” rolini gavdalantirgan Gulruh Pirnazarova bilan suhbat qurib, ba`zi gap-so`zlarga oydinlik kiritdik.

— "Qora quti"dagi ijroyingizgacha sizni tomoshabin u qadar tanimasdi. Gulruh Pirnazarova haqida aytib bering bizga... 

          — Avvalo, e`tibor uchun rahmat. “Boshqa bir tarafdan tanimas edi” desak to`g`ri bo`lsa kerak. Chunki “Qora quti” seriali birinchi ijodiy ishim emas. Unga qadar ham bir qancha serial va loyihalarda ishtirok etganman. Shunchaki meni salbiy qahramon sifatida tomoshabin endi ko`rdi. Personajim Yulduz xarakter jihatidan chindan ham salbiy. Istardimki, qizlarimiz men ijro etgan Yulduzning ahvoliga tushib qolishmasin. Ular qadrsizlanmasliklari uchun ularga oyna tutishni, juda xohladim.

Gulruh Pirnazarovaga kelsak, sodda, o`zbek qizi. 1995 yilda Qashqadaryo viloyatida tug`ilganman. San`at kolejini tugatib, to`rt yil O`zbekiston san`at va madaniyat oliygohini drama fakul`tetida o`qiganman. Hozirda esa drama teatrida aktrisa bo`lib ishlayman. 

— O`zingizni serialdagi Zara o`rnida qanday his qilgan bo`lardingiz? Agar siz o`n yillik turmushdan so`ng xiyonat ko`rsangiz... 

— Bilmadim ochig`i. Hali turmushga chiqmaganman, oila yuki boshimga tushmagan. Ammo bir narsani bilamanki, qars ikki qo`ldan chiqadi. Agar siz turmush o`rtog`ingizni sevgi, mehr, bir insonga berish mumkin bo`lgan hamma narsa bilan qamrab olsangiz, xiyonatga asos qolmaydi deb o`ylayman. Zeriksa o`zingizni olib qochib, mehr so`raganda mehr bersangiz, ish borasida u bilan do`st bo`lsangiz, erkak ham xiyonat qilishni xohlamasa kerak. Va men xiyonat haqida o`ylashni ham istamayman. Ilohim boshimga ham tushmasin. Yana nima desam ekan… Juda ham yomon rolda o`ynaganimni his etib qoldim hozir (kuladi)

— Rolingiz partnyoringizga yaqindan munosabat qilishni, quchoqlashni talab qilardi. Oila a`zolaringiz tarafidan bu borada tanqid eshitdingizmi?

— Chegaradan chiqmagan holda rol ijro etganmiz. Lekin hech qanday ortiqcha yoki haqiqiy narsa yo`q u erda. Uyimdagilar menga ishonishadi, ayniqsa, ota-onam. Men teatrda ishlayman, bu yo`nalishda oliygohda o`qiganman. Oila a`zolari bularning rol ekanini, texnikaligini his etib turishadi, tushunishadi. Ochig`i, hech bunday rol o`ynamagan edim.Hatto o`zim ham ba`zi sahnalarimdan uyalaman! Lekin rolimni maromiga etkazish va ishonarli chiqishi uchun shunday sahnalar qo`shish kerak edi. Va men aktrisa sifatida buni ijro etganman. Ammo yana aytaman bularning hech biri haqiqiy emas, bari sahna uchun.                                                                                                                                      

— Dublyajni, she`r o`qishni yaxshi ko`rasiz-a? Hatto “youtube”da kanalingiz ham bor…

—  Ha, dublyajni juda ham sevaman. Ovoz berishda hech ham charchamaganman. Qanday dublyaj bo`lishidan qat`i nazar ichimda ishtiyoqim kuchli. She`r o`qishni esa yoshligimdan yoqtiraman. Esimni tanibmanki, she`r yodlayman. 

— "Ishqdan kuygan oshiq"day ko`rinasiz. Ammo bu haqida savol berilsa, ochiqlamaysiz...

— Bu savolingizni ham ochiq qoldirsam bo`lardi (sirli kuladi) Mayli, javob beraman... Ishqdan kuygan oshiq emasman! Shunchaki dardli she`rlarni o`qishni yaxshi ko`raman!

Mohigul DIYoRXO`JAEVA suhbatlashdi

Sharhlar