Ayni kunlarda ijtimoiy tarmoqlarda “Hayit namozi o`qilmaydigan bo`ldi, bu borada O`zbekiston musulmonlari idorasi Ulamolar kengashi fatvosi e`lon qilindi” degan mazmundagi yolg`on xabar(feyk)lar tarqalmoqda.
Xabarlarga O`zbekiston musulmonlari idorasi oydinlik kiritdi. Ma`lum qilinishicha, mazkur xabarlar asossiz va haqiqatga mos kelmaydi.
Qayd etilishicha, ushbu feyk xabar bundan bir yil avval pandemiya davrida 2021 yil iyul oyida e`lon qilingan ma`lumotni qayta, ya`ni takroran tarqatilmoqda. Joriy yilda O`zbekiston musulmonlari idorasi Ulamolar kengashi bunday fatvo chiqarmagan.
Ma`lumot uchun, 2022 yil 1 iyul kuni Prezidentimiz “Qurbon hayitini nishonlash to`g`risida”gi qarorni imzoladi. Unga ko`ra joriy yilda Qurbon hayitining birinchi kuni 9 iyul – shanba kuniga to`g`ri kelishi to`g`risida O`zbekiston musulmonlari idorasi Ulamolar kengashi tomonidan qabul qilingan qarorni inobatga olinib, mutasaddi tashkilotlar hamkorlikda Qurbon hayiti xalqimizning milliy va diniy an`analariga mos ravishda o`tkazilishi uchun tegishli chora-tadbirlarni amalga oshirishi belgilandi.
"Qurbon hayiti namozini o`qish yuzasidan biror o`zgarish bo`ladigan bo`lsa, rasmiy nashrlarda e`lon qilinishini bildiramiz. Mo`min-musulmonlardan asossiz va haqiqatga to`g`ri kelmaydigan bunday xabarlarni tarqatmaslikni iltimos qilamiz", - deyiladi xabarda.
