Qizlarni Toshkentdan Turkiyaga fohishalik qilish uchun yuborayotgan ayollarga sud hukmi o`qildi

DXX matbuot xizmati "darakchi.uz"ga odam savdosi bilan shug`ullangan ayollarning jinoyatlari tafsilotlari haqida ma`lumot taqdim etdi.  

Ma`lum qilinishicha, Toshkent viloyatining O`rtachirchiq tumanida yashovchi, 1999 y.t. “M.R.” (ayol) hamda Nurafshon shahrida istiqomat qiluvchi, 2000 y.t. “Q.A.” (ayol) o`zaro til biriktirib, qizlarni Turkiya davlatiga fohishalik bilan shug`ullanish uchun yuborishgan.

Turkiyada yashovchi “A” ismli ayol esa qizlarga aviachipta sotib olish, ularni kutib olish hamda fohishalik bilan shug`ullantirish ishlariga mas`ul bo`lgan.

Jumladan, 2022 yilning aprel oyi boshlarida “M.R.” va“Q.A.”lar Toshkent shahrida yashovchi, 1992 y.t. “A.A.”ni Turkiya davlatiga borib, fohishalik bilan shug`ullanish orqali har oyda 2 ming AQSh dollari ishlab topishga qiziqtirishgan hamda dastlabki “daromadi”ning teng yarmini ularga berishi kerakligini tushuntirishgan.

O`z navbatida Turkiya davlatida yashovchi “A” ismli ayol “A.A.”ga xorijga chiqish pasporti olishi uchun 50 AQSh dollari va “Toshkent-Istambul-Anqara” yo`nalishi bo`yicha aviachipta yuborgan.

DXX xodimlari tomonidan IIV hamkorligida o`tkazilgan tezkor tadbirda “M.R.” qizni Toshkent xalqaro aeroportiga olib kelib, Turkiya davlatiga yubormoqchi bo`lgan vaqtida qo`lga olindi.

Shuningdek, tezkor-qidiruv tadbirlari jarayonida uning sherigi “Q.A.” ham ushlandi.

Ularga nisbatan Jinoyat Kodeksining 135-moddasi bilan jinoyat ishi qo`zg`atilib, tergov harakatlari olib borildi.

Joriy yilning avgust oyida jinoyat ishlari bo`yicha Mirobod tuman sudi tomonidan “M.R.”ganisbatan 3 yil va “Q.A.”ga nisbatan esa 5 yil muddatga ozodlikdan mahrum qilish jazosi tayinlandi. 

Lekin “Q.A.”ni oilaviy sharoitini, ikki nafar voyaga etmagan farzandlari borligini inobatga olib, Jinoyat Kodeksining 72-moddasi qo`llanilib, tayinlangan ozodlikdan mahrum qilish jazosi shartli hisoblanib, 2 yil sinov muddati belgilandi.