Evropa Ittifoqi mamlakatlari tashqi ishlar vazirlari kengashi Ukrainaga Evropa tinchlik jamg`armasi orqali umumiy qiymati 500 million evro bo`lgan ettinchi harbiy yordam transhini berishga kelishib oldi. Bu haqda Bryusselda bo`lib o`tgan matbuot anjumanida Evropa Ittifoqining tashqi ishlar va xavfsizlik bo`yicha oliy vakili Xosep Borrel ma`lum qildi.
U, shuningdek, EI davlatlari tomonidan Ukraina harbiylarini tayyorlash bo`yicha Evropa Ittifoqining maxsus missiyasi uchun yana 45 million evro ajratish bo`yicha kelishuvga erishilganini ma`lum qildi. 15 000 nafar ukrainalik askarni asosiy tayyorgarlikdan o`tkazish uchun mo`ljallangan ushbu missiya 2022 yil oxirida Polshada boshlangan.
Shu tariqa, 2021 yilda EI tomonidan asos solingan Evropa tinchlik jamg`armasi orqali Ukrainaga ajratiladigan mablag` 3,6 milliard evroga etadi. Ayni paytda, Evropa Ittifoqi va unga a`zo davlatlar tomonidan Ukrainaga ko`rsatilgan yordamning umumiy miqdori 50 milliard evroga yaqinlashdi va bu Evropa Ittifoqini Ukrainaga yordam ko`rsatish bo`yicha dunyoda etakchiga aylandi, dedi Borrel.
