Bugun Turkmanistonda parlament (mejlis)ga, shuningdek viloyat, tuman, shahar xalq kengashlari hamda mahalliy o`zini o`zi boshqarish organlariga saylov bo`lib o`tadi.
Saylov va referendum o`tkazish bo`yicha Markaziy komissiya ma`lumotiga ko`ra, saylovchilar ettinchi chaqiriq parlament, beshinchi chaqiriq viloyat, etrop va shahar xalq maslahati, to`qqizinchi chaqiriq gengesh deputatlarini saylaydi.
Respublika bo`yicha jami 2644, mamlakatning xorijdagi diplomatik vakolatxonalarida qo`shimcha 42 saylov uchastkasi ochiladi.
Ma`lumot o`rnida aytish kerak, Turkmaniston parlamentida 125, viloyat xalq maslahatida 240, etrap va shahar kengashlarida 960, gengeshlarda 5897 o`rin mavjud. Parlament sayloviga 3 siyosiy partiyadan – hukmron Demokratik, Sanoatchilar va tadbirkorlar hamda Agrar partiyalardan nomzod ko`rsatilgan. Bundan tashqari fuqarolarning tashabbuskor guruhlaridan mustaqil nomzodlar ham bor. Parlament tarkibiga kirish uchun jami 258 kishi – siyosiy partiyalardan 175 va mustaqil 83 nomzod kurash olib boradi. Viloyat va Ashxobod xalq maslahati deputatligiga 515, etrop va shahar xalq maslahatiga 2001, gengeshlarga 12 ming 980 nomzod ro`yxatga olingan.
Parlament deputatlari, xalq maslahati va gengesh a`zolari besh yil muddatga saylanadi.
Turkmanistonda jami 3 496 475 saylovchi ro`yxatga olingan bo`lib, ularning 75 606 nafari birinchi marta ovoz beradi. Saylovga 2855 xorijiy kuzatuvchi, xususan, BMT, MDH, Turkiy davlatlar tashkiloti, Shanxay hamkorlik tashkiloti va EXHT vakillari yuborilgan.
