Qashqadaryo viloyati Dehqonobod tumanining olis Oqtosh mahallasida yashovchi 75 yoshli Xolmat bobo xonadonida farzand dunyoga keldi.
Ammo chaqaloqqa guvohnoma olish lozim, buning uchun esa yangidan turmush qurgan ayoli bilan nikohdan o`tish kerak edi. Yo`l olis, shuning uchun FHDYo xodimlari sayyor xizmatlari qildi.
Farzand oila quvonchi, nasl davomchisi, ota-onaning baxti hisoblanadi. Har bir oilada farzand dunyoga kelar ekan kattalar buni rizq nasiba keldi deb e`tirof etishadi. Xolmat boboning xonadonida ham bugun xursandchilik. 75 yoshli Xolmat bobo yana bitta farzandli bo`ldi.
Dehqonobod tuman FHDYo bo`limi 75 yoshli otaxonni quvonchiga sherik bo`ldi. Tuman markazidan 80 kilometr uzoqlikda joylashgan Oqtosh mahalla fuqarolar yig`inida yashovchi 75 yoshli Xolmat bobo Saidov hamda Xosiyat Beknazarovaga nikoh guvohnomasi hamda farzandlari Madinaxon Saidovaga ham tug`ilganlik guvohnomasi sayyor tartibda topshirildi. Masofa uzoqligi sabab tuman markaziga borishga imkoniyati bo`lmagan fuqarolarning shu kuni muammosi ijobiy hal etildi.