2023 yilning 3 iyul kuni Temuriylar tarixi davlat muzeyi, O`zbekiston tarixi davlat muzeyi va O`zbekiston tasviriy san`at galereyasida “O`zbekiston madaniy merosi jahon to`plamlarida” loyihasi “O`zbekiston madaniy merosi – yangi Renessans davri asosi” haftaligi doirasida “Madaniy meros" turkumidagi 50 jildli kitob-albomlarni tantanali topshirish marosimi bo`lib o`tdi. Bu kitoblarda xorij muzeylarida saqlanayotgan O`zbekiston tarixi va madaniyati bilan bog`liq nodir eksponatlar haqidagi ma`lumotlar o`rin olgan. Ushbu tadbir mamlakat uchun katta madaniy va ilmiy ahamiyatga ega bo`lib, milliy madaniy merosni asrab-avaylash va targ`ib etishda muhim qadam bo`ldi.
Ko`p yillar davomida O`zbekiston tadqiqotchilari va olimlari xorijlik hamkasblari bilan birgalikda jahon muzeylarida saqlanayotgan, O`zbekiston tarixi va madaniyatiga oid nodir eksponatlar haqida ma`lumotlarni to`plab, tizimlashtirib kelishmoqda. Bu boradagi ishlar samarasida 50 dan ortiq jildni o`z ichiga olgan “O`zbekiston madaniy merosi jahon to`plamlarida” nomli noyob kitob-albomlar to`plami yaratildi.
Kitoblarda O`zbekiston tarixi, madaniyati va san`atiga oid matolar, kulolchilik buyumlari, rangtasvir asarlari va boshqalar haqida ma`lumotlar mavjud. Har bir jildda tavsiflar, illyustrasiyalar va eksponatlar tahlili berilgan bo`lib, bu kitoblar turkumini nafaqat tadqiqotchilar uchun qimmatli ma`lumot manbai, balki keng auditoriya uchun ham ajoyib o`quv va qo`shimcha manbaga aylantiradi.
Muzeylarga kitob sovg`a qilish O`zbekiston milliy madaniyati uchun katta ahamiyatga ega, chunki bu mamlakatning noyob merosini asrab-avaylash va targ`ib qilish imkonini beradi, shuningdek, O`zbekiston tarixi va madaniyatini jahon miqyosida o`rganishga xizmat qiladi.
Tadbir ko`plab olimlar, madaniyat va jamoatchiligi vakillarining e`tiborini tortdi va ular ushbu tadbirning O`zbekiston uchun ahamiyati beqiyosligi haqida gapirishdi. Marosimda milliy muzeylar vakillari, olimlar, jurnalistlar, madaniyatshunoslar ishtirok etishdi.
Bunday qimmatli madaniy merosni qabul qilish va asrab-avaylash barcha muzeylar va butun xalqimiz uchun katta sharafdir. Kitoblar ommaga taqdim etiladi va O`zbekiston tarixi hamda madaniyati haqida mamlakat ichida va uning tashqarisida qimmatli bilim manbaiga aylanadi.
