Turkiyaning nufuzli nashriyotlaridan biri “Baygenç Yayıncılığı”da taniqli jurnalist, O`zbekiston Yozuvchilar uyushmani a`zosi, shoir Olimjon O`sarovning “Aşktan Bir Dünya Kuracağim” (“Muhabbatdan Vatan quraman”) nomli she`rlar to`plami turk tilida nashr qilindi.
Turkiyaning Alaniya shahrida ushbu kitobning taqdimot bo`lib o`tdi. Unda davlat va jamoat arboblari taniqli shoirlar va yozuvchilar, ommaviy axborot vositalari vakillari ishtirok etdi.
Tadbirni Alaniya hokimi o`rinbosari, yozuvchi Abdulla Akbash va Jurnalistlar jamiyati prezidenti Ferit Kesen kirish so`zi bilan ochdi.
“Baygenç Yayıncılığı” nashriyoti direktori Arslan Bayir kitobdan shoirning Vatan, istiqlol, muhabbat mavzuidagi eng sara she`rlari o`rin olganligini va kitob 10000 nusxada chop etilganini ta`kidladi.
Tadbirda so`zga chiqqan Turkiya Tabiat turizmi uyushmasi prezidenti Shafak Kuru kitobdan o`rin olgan she`rlar orqali O`zbekistonning betakror tabiati, go`zal kentlari, tarixiy obidalari ko`z o`ngida namoyon bo`lgani va beixtiyor ota yurt sog`inchini his etgani, o`quvchini bu jannatmonand zaminga sayohatga chorlayotgandek tasavvur uyg`otganini qayd etdi.
Shuningdek, taqdimotda tarixchi O`guz Korum, yozuvchilar va shoirlar – Ahmet Olgun, Zelixa Bashar Oner, Ayshegul Bilir O`ruju, Garip Gorgulu, Ugur Sarigul kitob haqida o`z fikr-mulohazalarini bildirdi.
Ushbu kitob taqdimot turk matbuotida, xususan, “Gündem Alanya” sayti va “Ankhaber” gazetasida keng yoritildi.
Ma`lumot o`rnida aytish joizki, Alaniya shahri Turkiyaning O`rta er dengizi sohilidagi mashhur turistik markaz hisoblanadi va yoz faslining bu davrida ko`plab shoir va yozuvchilar aynan Alaniyada ijodiy ta`tilda bo`lishadi.
