BMT Aksilterror boshqarmasi va O`zbekiston prezidenti huzuridagi Strategik va mintaqalararo tadqiqotlar instituti o`rtasida memorandum imzolandi.
Memorandum asosiy tamoyillar va hamkorlik yo`nalishlari, jumladan nashrlar va tadqiqot ma`lumotlari almashinuvi, BMTning Global aksilterror strategiyasi doirasida qo`shma loyihalarni amalga oshirish, shuningdek, tomonlarni qiziqtirgan boshqa masalalarni hal etishni aks ettiradi.
BMTning Nyu-Yorkdagi shtab-kvartirasida o`zaro anglashuv memorandumini imzolash marosimi bo`lib o`tgan.
Hujjatni BMT bosh kotibi o`rinbosari, BMT Aksilterror boshqarmasi rahbari Vladimir Voronkov hamda O`zbekiston prezidenti huzuridagi Strategik va mintaqalararo tadqiqotlar instituti direktori Eldor Aripov imzoladi.
V.Voronkov hujjatlarni imzolash marosimidagi nutqida BMT tuzilmalari bilan har tomonlama hamkorlikni rivojlantirishga qaratilayotgan e`tibor uchun O`zbekiston prezidentiga minnatdorlik bildirdi.
Shuningdek, u O`zbekiston hukumatiga BMTning Aksilterror boshqarmasi faoliyatiga moliyaviy hissa qo`shayotgani uchun minnatdorlik izhor etdi.
