Ko‘ksaroy qarorgohida Hindiston Bosh vaziri Narendra Modiga O‘zbekistonning "Oliy darajali Do‘stlik" ordenini topshirish marosimi bo‘lib o‘tdi. Mukofot Prezident Shavkat Mirziyoyevning farmoniga asosan berildi.
Shavkat Mirziyoyev ushbu qaror Narendra Modining O‘zbekiston va Hindiston xalqlari o‘rtasidagi azaliy do‘stlik rishtalarini mustahkamlashga qo‘shayotgan beqiyos hissasiga yuksak ehtirom ifodasi ekanini ta’kidladi.
Prezident Hindistonning so‘nggi yillardagi jadal taraqqiyoti va xalqaro maydondagi nufuzi ortib borayotganini qayd etdi.
"Umumiy intilish va harakatlarimiz bilan ko‘p qirrali va uzoq muddatli aloqalarimiz kelgusida ham jadal rivojlanib borishiga aminman", — dedi Shavkat Mirziyoyev.
Eslatib o‘tamiz, tashrif doirasida O‘zbekiston va Hindiston o‘rtasidagi tovar ayirboshlash hajmini 2030 yilga qadar 5 milliard dollarga etkazish bo‘yicha kelishuvga erishildi.
