O`zbekistonda pochta aloqasi xizmatlarini ko`rsatish qoidalari ishlab chiqildi

O`zbekiston raqamli texnologiyalar vazirining “Pochta aloqasi xizmatlarini ko`rsatish qoidalarini tasdiqlash to`g`risida”gi buyrug`i loyihasi muhokamalar portalida e`lon qilindi.

Qoidalar Umumjahon pochta ittifoqi hujjatlari, O`zbekistonning "Pochta aloqasi to`g`risida"gi, "Iste`molchilarning huquqlarini himoya qilish to`g`risida"gi, "Jismoniy va yuridik shaxslarning murojaatlari to`g`risida"gi qonunlariga muvofiq pochta aloqasi xizmatlarini ko`rsatuvchi pochta aloqasi operatorlari, provayderlari va bu xizmatlardan foydalanuvchilar o`rtasidagi munosabatlarni tartibga soladi.

Pochta aloqasi xizmatlarini ko`rsatish tartibini, pochta aloqasi operatorlari, provayderlari hamda foydalanuvchilarning huquq va majburiyatlarini belgilaydi.

Shuningdek, pochta aloqasi operatorlari va provayderlari pochta aloqasi xizmatlarini (pochta, kurerlik jo`natmalarini qabul qilish, qayta ishlash, tashish va etkazib berish) ko`rsatish bo`yicha faoliyatni Umumjahon pochta ittifoqi hujjatlari, O`zbekiston qonunchiligi va bu qoidalar asosida amalga oshiradi.

Pochta aloqasi milliy operatori mamlakat hududida Umumjahon pochta ittifoqi hujjatlariga muvofiq O`zbekistonning majburiyatlarini bajarish bo`yicha tayinlangan pochta operatori maqomiga ega.

Umumjahon pochta ittifoqining blanklari va hujjatlari faqat milliy operator tomonidan foydalanilishi mumkin.

Milliy operator oddiy xatlarni, pochta varaqchalarini va pul mablag`larining pochta o`tkazmalarini, davlat organlari va tashkilotlarining elektron pochta jo`natmalarining Yagona milliy tizimi orqali jo`natilgan yozma xat-xabarlarini, bildirishnomalarini, chaqiruv qog`ozlarini va boshqa yuridik ahamiyatga ega hujjatlarini etkazib berish (topshirish) bo`yicha pochta xizmatlarini ko`rsatishda mutlaq huquqiga ega.

Milliy operatorga O`zbekiston butun hududida universal pochta xizmatlarini majburiy ravishda ko`rsatish bo`yicha vazifalar yuklatiladi.

Pochta aloqasi operatorlari va provayderlarining huquqlari:

o`zlariga tegishli avtotransport vositalaridan, shuningdek yuridik va jismoniy shaxslarga tegishli, maxsus farqlash belgilariga ega bo`lgan transport vositalaridan shartnoma asosida foydalanadi;

belgilangan tartibda tasdiqlangan pochta normativlarini hisobga olgan holda, pochta aloqasi obektlari tomonidan ko`rsatiladigan pochta aloqasi xizmatlari ro`yxatini mustaqil ravishda belgilaydi;

qonunchilik hujjatlariga muvofiq faoliyatning boshqa turlarini amalga oshiradi.

Pochta jo`natmalarini tezlashtirilgan pochta rejimida qabul qilish joyida, ko`rinadigan va foydalanuvchilar uchun qulay joyda xalqaro tezkor pochta jo`natmalari qabul qilinadigan mamlakatlar ro`yxati bo`lishi kerak.