Prezident Shavkat Mirziyoev qayta tiklanuvchi energiya manbalarini ko`paytirish bo`yicha 2024 yil uchun ustuvor vazifalarga bag`ishlangan yig`ilish o`tkazmoqda. Bu haqida davlat rahbarining Matbuot kotibi xabar bermoqda.
Tahlillarga ko`ra, yurtimizda quyosh va shamol energiyasi salohiyati elektrga bo`lgan hozirgi ehtiyojni 10-12 barobar ortig`i bilan qoplashga etarli ekani ta`kidlandi.
Shunday ulkan imkoniyatni ishga solish masalasiga ancha yillar davomida e`tibor berilmay kelingani, lekin so`nggi yillarda bu sohada huquqiy baza yaratilgani tufayli investorlar uchun jozibador muhit shakllangani qayd etildi.
“Yashil energiya” manbalarini barpo qilish bo`yicha yurtimizda katta dasturlar boshlandi. Bugungi kunga qadar sohaga 2,1 milliard dollar to`g`ridan-to`g`ri xorijiy investisiya kirib keldi, yana 13 milliard dollarlik loyihalar amalga oshirilmoqda.
Yig`ilishda ma`lum qilinishicha, deyarli barcha viloyatlarda zamonaviy quyosh va shamol elektr stansiyalari barpo etilmoqda.
Jumladan, Buxoro, Jizzax, Qashqadaryo, Navoiy, Samarqand va Surxondaryoda 1,6 gigavattli 9 ta yirik quyosh va shamol elektr stansiyalari ishga tushdi.
Andijon, Samarqand, Surxondaryo va Toshkent viloyatida 183 megavattli 6 ta yirik va kichik GESlar foydalanishga topshirildi.
Shuningdek, ijtimoiy soha ob`ektlari, korxona va tashkilotlar, tadbirkorlarga tegishli binolar va aholi xonadonlarida umumiy quvvati 457 megavattli quyosh panellari o`rnatildi.
