Oliy Majlis Senati raisi Tanzila Norbaeva Nyu-York shahrida BMT bosh kotibi Antoniu Guterrish bilan uchrashuv o`tkazdi. Bu haqda "Dunyo" AA muxbiri xabar qilmoqda.
Parlament yuqori palatasi ma`lumotiga ko`ra, O`zbekistonning BMT va uning ixtisoslashgan idoralari bilan hamkorligining hozirgi holati va istiqbollari ko`rib chiqildi.
Shuningdek, muloqot davomida Markaziy Osiyo mamlakatlari o`rtasidagi mintaqaviy hamkorlikni mustahkamlash va davlatlar o`rtasidagi so`nggi yillarda to`plangan ijobiy sheriklik tajribasiga alohida e`tibor qaratildi.
Suhbat davomida Barqaror rivojlanish maqsadlarini amalga oshirish bilan bog`liq, jumladan, gender tengligini ta`minlash masalalari ham muhokama qilindi.
Antoniu Guterrish Markaziy Osiyo mamlakatlari o`rtasidagi munosabatlarning bugungi ijobiy holatida O`zbekistonning muhim roliga alohida to`xtalib o`tdi.
"Prezident Shavkat Mirziyoevning sa`y-harakatlari bilan Markaziy Osiyo bugun ahil-inoq yashamoqda, mamlakatlar barcha sohalarda jadal hamkorlik qilmoqda. O`zbekiston tashabbusi bilan mintaqa ayollari ham faoliyati ishonchli qo`llarda bo`lgan Markaziy Osiyo mamlakatlari etakchi ayollarining noyob muloqoti doirasida birlasha oldi", dedi u.
Suhbat chog`ida O`zbekiston tashabbuslarini xalqaro maydonda ilgari surish, mamlakatda amalga oshirilayotgan islohotlar hamda mintaqaviy hamkorlikni kengaytirishga doir aniq takliflarni qo`llab-quvvatlashda BMT bilan konstruktiv hamkorlik yuzasidan fikr almashildi.
Samimiy va amaliy ruhda kechgan muloqot yakunida O`zbekiston va BMT o`rtasida barcha sohalarda o`zaro manfaatli munosabatlarni yanada kengaytirishga kelishib olindi.